काठमांडू- नेपाळमध्ये रविवारी भरकटलेल्या विमानाला अपघात झाला असून या विमान दुर्घटनेतील सर्व १८ प्रवाशांचे मृतदेह सोमवारी सापडले. नेपाळ एअरलाईन्सचे हे विमान खराव हवामानामुळे बर्फाच्छादीत पर्वताजवळ कोसळले होते. पोखरा विमानतळावरून दुपारी १२ वाजून ४० मिनिटांनी उड्डान घेतल्यानंतर ३५ मिनिटांतच हे विमान दिशा भरकटले होते. हे विमान जुमला विमानतळावर १.४५ वाजता पोहचणे अपेक्षित होते. मात्र ते भरकटले आणि काठमांडूपासून ५०० किलोमीटर अंतरावरील धिकुरा गावाजवळ हे विमान कोसळले.
या विमानात तीन कर्मचा-यांसह १५ प्रवासी होते. अर्गखांची जिल्ह्यातील धिकुरा गावाजवळच्या पर्वतीय भागातून सर्व मृतदेह ताब्यात घेतले असून ते विमानाने काठमांडू येथे आणल्याचे नेपाळ पोलिसांचे प्रवक्ते गणेश केसी यांनी सांगितले.वारंवार अपघात होत असल्याने मागच्या वर्षी डिसेंबर महिन्यात युरोपियन देशांनी सुरक्षिततेच्या कारणास्तव नेपाळ एअर लाईन्सला काळ्या यादीत टाकले होते.यापूर्वी २८ सप्टेंबर २०१२ रोजी काठमांडूजवळ झालेल्या विमान दुर्घटनेत १९ प्रवाशांचा मृत्यू झाला. यात सात ब्रिटीश व पाच चीनी पर्यटक आणि अन्य नेपाळी प्रवाशांचा समावेश होता. हे विमान सिता एअरचे होते आणि काठमांडूहून लूकलासाठी टेक ऑफ केले होते. पोलिस अधिकारी विनोद सिंग यांच्या म्हणण्यानुसार आग लागताच पायलटने विमान मनोहरा नदीकिनारी उतरवण्याचा प्रयत्न केला पण तो सफल झाला नाही.तर मे २०१२ मध्ये पश्‍चिम नेपाळच्या एका टेकडीवर अग्नि हे छोटे विमान आदळून झालेल्या अपघातात १५ जण ठार झाले. त्यापैकी १३ भारतीय होते. तर वाचलेल्या सहा जणांपैकी तीन भारतीय होते. त्याआधी सात महिन्यांपूर्वीच नेपाळमधील एका विमान अपघातात दहा भारतीय पर्यटक ठार झाले होते.