रायगड – जिल्ह्यातील कर्जतजवळील नेरळ येथील मोहाची वाडी इथे घराची भिंत कोसळून 5 जण ठार झाल्याची घटना घडली आहे.
मुसळधार पावसाने आता बळी घ्यायला सुरुवात केली आहे. रायगड जिल्ह्यातील कर्जतजवळील नेरळ येथील मोहाची वाडी इथे घराची भिंत कोसळून 5 जण ठार झाल्याची घटना घडली आहे.या घटनेत एकाच घरातील चारजणांचा मृत्यू झाल्याचे समजते. पहाटे साडेपाच वाजेची ही घटना आहे. किसन दिघे, सुनंदा दिघे, जाईबाई कदम, अर्चना दिघे यांचा मृत्यू झाला आहे.
सलग सुरू असणार्‍या पावसामुळे राज्यात अनेक ठिकाणी अशा घटना घडत आहेत. गेल्या तीन दिवसांपासून मुंबईसह रायगड परिसरातही पावसाने धुमाकूळ घातला आहे. रायगड जिल्ह्यात 24 तासातसरासरी 137 मिलीमिटर पावसाची नोंद झाली आहे.

नागपुर – उत्तरप्रदेशमध्ये पत्रकाराला जिवंत जाळण्याची घटना ताजी असताना वर्ध्यात पुन्हा एका पत्रकाराला जिवंत जाळून ठार मारण्याची खळबळजनक घटना घडलीये. संदीप कोठारी असं या पत्रकाराचं नाव आहे. संदीप कोठारी यांचं मध्यप्रदेशमधून अपहरण करून वर्ध्यात बुटीबोरी इथं जिवंत जाळून हत्या करण्यात आली. या प्रकरणी विशाल तांडी आणि ब्रजेश डहरवाल या दोन आरोपींना अटक करण्यात आलीये. तिसरा आरोपी फरार आहे. चिटफंड कंपन्या, भू-माफिया आणि अवैध मायनिंग माफियांचा या प्रकरणाशी संबंध असल्याचा पोलिसांना संशय आहे.
19 जून रोजी संदीप कोठारी यांचं मध्यप्रदेश जिल्ह्यातील बालघाटमधून अपहरण करण्यात आलं होतं. संदीप कोठारी संध्याकाळी आपल्या घरी परतत असताना रात्री 9.30 च्या सुमारास आरोपी विशाल तांडी आणि ब्रजेश डहरवाल यांनी त्यांचं अपहरण केलं. संदीप यांना एका कारमध्ये बसवून बालघाटपासून दोन किलोमिटर अंतरावर वर्ध्या जिल्ह्यातील बुटीबोरी परिसरात रेल्वे ट्रॅकजवळ आणून मारहाण केली आणि जिवंत पेटवून दिलं.
आरोपी एवढ्यावरच थांबले नाही. त्यांनी मृत संदीप कोठारी यांना घटनास्थळीच जमिनीत पुरण्याचा प्रयत्न केला. दुसर्‍या दिवशी घटनास्थळापासून जवळच असलेल्या सिंधी स्टेशन पोलिसांना बेवारस मृतदेहाची माहिती मिळाली. पोलिसांनी संदीप कोठारी यांचा मृतदेह अज्ञात समजून जिल्हा रुग्णालयात शवविच्छेदनासाठी पाठवून दिला होता. पण, रात्री उशीर झाल्यामुळे शवविच्छेदन होऊ शकलं नाही. अखेर बालघाट पोलिसांनी मृतदेह ताब्यात घेतला. त्यानंतर पोलिसांनी तपासाची चक्र फिरवली. या प्रकरणी पोलिसांनी चिटफंड कंपनीशी संबंधीत असलेल्या विशाल तांडी आणि जमीन व्यवहाराशी संबंधी असलेल्या बुटीबोरी येथील रहिवाशी ब्रजेश डहरवाल या दोघांना संशयित म्हणून ताब्यात घेतलं. अगोदर दोघांनी उडवा उडवीची उत्तर दिली. मात्र, पोलिसांनी खाक्या दाखवताच दोघांनी संदीप कोठारी यांचं अपहरण आणि हत्येची कबुली दिली.
संदीप कोठारी यांनी चिटफंड आणि अवैध जमीन व्यवहार प्रकरणी आरोपी विशाल तांडी आणि ब्रजेश डहरवाल यांच्याविरोधात तक्रार
केली होती. विशाल तांडीच्या विरोधात राजस्थान जिल्ह्यातील उदयपूर येथील हिरणमगरी पोलीस स्टेशनमध्ये गुन्हाही दाखल करण्यात आलाय. तर दुसरा आरोपी ब्रजेश डहरवालच्या विरोधात संदीप यांनी जमीन गैरव्यवहाराची तक्रार दिली होती. त्याचबरोबर मायनिंग माफियांच्याविरोधातही संदीप कोठारी यांनी आवाज उठवला होता. आपल्या विरोधात तक्रार दिला याचा राग धरून आरोपींनी हत्या केल्याचं कबूल केलंय. या प्रकरणी राकेश नर्सवाली हा तिसरा आरोप अजूनही फरार असून पोलीस अधिक तपास करत आहे.

मुंबई- अहमदाबाद महामार्गावर सोमवारी पहाटे टाटा मॅजिक आणि ट्रकमध्ये झालेल्या भीषण अपघात चार महिलांचा मृत्यू झाला.
पालघर येथील नवझे गावातील एका गरोदर महिलेच्या पोटात दुखू लागल्यामुळे तिला तात्काळ उपचारासाठी टाटा मॅजिक रिक्षातून रुग्णालयात नेण्यात येत होते. त्यावेळी चालकाचा गाडीवरचा ताबा सुटल्याने रिक्षा वरई रस्त्यावरील गुंदावे येथे रस्त्याकडेला उभ्या असलेल्या रेतीच्या ट्रकवर जाऊन आदळली. पहाटे साडेतीनच्या सुमारास झालेल्या या अपघातात गर्भवती महिलेसह अन्य तीन महिलांचा मृत्यू झाला.भारती भरत पाटील (आशा), भानुमती भाऊ लाबड, संगीता कल्पेश चिमडा आणि यमुना उध-या दोड अशी या अपघातात ठार झालेल्या महिलांची नावे आहेत.

नाशिक : लासलगावतील हमाली करणा-या एका बापाच्या कष्टाचे चीज झाले असून मेहनत आणि जिद्दीच्या जोरावर मात करत सचिन न्याहारकर हा हमालाचा मुलगा आता न्यायाधीश झाला आहे.
सचिन उत्तमराव न्याहारकर याने न्यायाधीश परीक्षेत ओबीसी गटातून राज्यात दुसरा येण्याचा मान पटकावला असून त्याने मिळविलेल्या या यशामुळे सचिनवर गावकरी शुभेच्छांचा वर्षाव करत आहेत. सचिनने दहावीपर्यंतचे शिक्षण गावातच घेऊन बारावीपर्यंतचे शिक्षण लासलगाव येथे घेतले. बारावीत चांगले मार्क मिळाल्याने सचिनने पुण्यातील लॉ कॉलेजला प्रवेश घेतला. घरातील परिस्थिती नाजूक, आई-वडिलांनी पोटाला चिमटा काढत मुलांच्या शिक्षणात कुठलीच कसूर ठेवली नाही. नातेवाईकांच्या मदतीने पुण्यात पोहोचला आणि तेथे शिकत असतानाच त्याने न्यायाधीशाची परीक्षा दिली. या परीक्षेसाठी राज्यभरातून ४७ हजार विद्यार्थी बसले होते, त्यापैकी दोन हजार ४०० विद्यार्थी पास झाले तर ३७८ जणांना निमंत्रित करण्यात आले. अत्यंत जिद्दीने अभ्यासावर लक्ष केंद्रीत करत त्याने महाराष्ट्र लोकसेवा आयोगाची न्यायाधीशांची परीक्षा दिली. नुकताच या परीक्षेचा निकाल जाहीर झाला असून, सचिनने राज्यात दहावा आणि इतर मागासवर्गीय गटातून (ओबीसी) दुसरा क्रमांक मिळवला आहे.

मुंबई – मुंबई विमानतळावर उतरलेल्या जेट एअरवेजच्या विमानातून शनिवारी सकाळी सीमा शुल्क अधिका-यांनी दोन कोटीचे सोने जप्त केले.
९ डब्लू ५३९ या जेट एअरवेजच्या मस्कत-मुंबई विमानातील प्रसाधनगृहातून सीमा शुल्क अधिका-यांनी आठ किलो सोने जप्त केले.
सेगू नैना महम्मद शेखथीन शा या प्रवाशाला या प्रकरणी अटक करण्यात आली आहे. विमानातील प्रसाधनगृहात सोने लपवल्याची कबुली त्याने दिली अशी माहिती हवाई गुप्तचर अधिका-याने दिली.
अटक केलेल्या आरोपीची न्यायालयीन कोठडी मिळवण्यासाठी त्याला न्यायालयासमोर हजर करण्यात येणार आहे. एप्रिल महिन्यात दुबई-मुंबई विमानातून २४.६८ लाख रुपये किंमतीची सोन्याची दोन बिस्कीटे जप्त करण्यात आली होती.
त्यानंतर दोहा-मुंबई विमानात प्रवाशाच्या आसनाखाली १.८ किलो वजनाची सोन्याची १६ बिस्कीटे सापडली होती. फ्रेबुवारी महिन्यात मस्कतला जाणा-या आंतरराष्ट्रीय विमानाच्या प्रसाधनगृहातून १.४९ कोटी रुपये किंमतीचे सहा किलो सोने जप्त करण्यात आले होते.
११ फेब्रुवारीपासून चारवेळा विमानतळाशी संबंधित कर्मचा-यांना सोने तस्करीशी संबंधित प्रकरणात अटक करण्यात आली आहे. जानेवारीपासून सीमा शुल्क विभागाने आतापर्यंत मुंबई विमानतळावरुन २५० किलो सोने जप्त केले आहे. या वर्षातील सर्वाधिक सोने जप्तीची कारवाई शनिवारी करण्यात आली.

आर्णी , दि. ६ – माहुर येथून दर्शन घेऊन गावाकडे परत जाताना इंडीका झाडावर आदळली. यामध्ये एक युवती जागीच ठार असून तीन जण जखमी झाले. दहिसावळी येथे आज शनिवारी सायंकाळी ६.३० वाजता ही घटना घडली.
आरती बाबुसिंग जाधव (१९) असे मृतक युवतीचे नाव आहे. तर अतीष संजय जाधव (२२), टिना रमेश राठोड (२०), आकाश बाबुसिंग जाधव (२५) रा. घाटकिन्ही ता. दारव्हा अशी जखमींची नावे आहे. एम.एच. २९ / १७८६ क्रमांकाच्या इंडीकाने ते माहुर येथे रेणुकामातेच्या दर्शनासाठी गेले होते. दर्शन घेऊन ते लोणबेहळ येथे परत आले. त्यावेळी गाडीतील एकाचा मोबाईल माहुर येथे हॉटेलमध्ये विसरल्याचे लक्षात आले. त्यामुळे तेथून पुन्हा माहुर येथे गेले. तेथून परत येत असताना चालकाचे नियंत्रण सुटल्याने इंडीका दहिसावळी जवळ झाडावर आदळली. यामध्ये आरती, अतीष, टिना, आकाश हे जखमी झाले. तर आरतीचा रुग्णालयात मृत्यू झाला. जखमीवर यवतमाळ येथील रुग्णालयात उपचार सुरू आहे. महामार्ग पोलीस अजय डोळे, चालक दिपक चातारकर यांच्यासह बाबाराव गावंडे, निलेश आचमवार यांनी जखमींना रुग्णालयात हलविण्यासाठी मदत केली. या प्रकरणी पोलिसांनी गुन्हा दाखल केला असून तपास सुरू आहे.

नवी दिल्ली, दि. २ – आगामी बांग्लादेश दौ-यासाठी माजी खेळाडू रवी शास्त्री यांची भारतीय क्रिकेट संघाचे हंगामी प्रशिक्षक म्हणून नियुक्ती करण्यात आली आहे. बीसीसीआय सचिव अनुराग ठाकूर यांनी मंगळवारी हा निर्णय जाहीर केला. गेल्या वर्षी झालेला ऑस्ट्रेलिया दौरा व त्यानंतर पार पडलेल्या विश्वचषक स्पर्धेदरम्यान शास्त्री यांनी भारतीय संघासाठी ‘टीम डायरेक्टर’ म्हणून काम पाहिले होते. दरम्यान संजय बांगर यांची बॅटिंग कोच म्हणून, बी अरूण यांची बॉलिंग कोच म्हणून आणि आर. श्रीधर यांची फिल्डिंग कोच म्हणून नियुक्ती कायम ठेवण्यात आली आहे. येत्या १० जूनपासून भारतीय संघ बांग्लादेशच्या दौ-यावर जाणार असून तेथे एक कसोटी व तीन एकदिवसीय सामने खेळण्यात येणार आहेत.

यवतमाळ, दि. १- शहरालगत लोहारा एमआयडीसीतील प्रियदर्शनी सहकारी सुतगिरणीला आग लागुन ७०० रुईच्या गाठी खाक झाल्या. रविवारी रात्री ही घटना घडली असून यामध्ये कोट्यावधी रुपयाचे नुकसान झाले आहे.
सुतगिरणीत कामगार रिसायलींगचे काम करीत होते. दरम्यान गारगोटीमध्ये संघर्ष होऊन ठिणगी ब्लो रुममध्ये उडाल्याने रुममध्ये असलेल्या रुईच्या गाठीनीने पेट घेतला. पाहता-पाहता आगीने रौद्ररुप धारण करून तेथील रुई गठाणी कवेत घेतले.ही बाब लक्षात येताच घटनास्थळी अग्नीशमन दलाला पाचारण करण्यात आले. सहा बंब पाण्याचा मारा केल्यानंतर आज सोमवारी पहाटे ही आग आटोक्यात आली. यावेळी उपविभागीय अधिकारी विकास माने, तहसीलदार अनूप खांडे, मुख्याधिकारी अतूल पंत यांचेसह पोलीस अधिकाºयोनी घटनास्थळाला भेट दिली. या आगीत ७०० रुईच्या गाठी जळून खाक झाल्या असून कोट्यावधीचे नुकसान झाले.

यवतमाळ – विभागात भरारी पथकाद्वारे अमरावती व अकोला जिल्ह्यातील दोन बोगस रासायनिक खत विक्रेत्याविरूध्द कारवाही करून त्यांच्यावर पोलीसात गन्हे दाखल करण्यात आल्याची माहिती विभागीय
कृषी सहसंचालक कार्यालयाव्दारे देण्यात आली. शेतकऱ्यांची फसवणूक होऊ नये यासाठी विभाग, जिल्हा व तालुका स्तरावर भरारी पथक स्थापन करण्यात आले आहे. दोन- तीन दिवसापुर्वी भरारी पथकाने अमरावती जिल्ह्यातील दर्यापूर येथील राजू वानखडे यांच्याकडे धाड टाकूण अंदाजे तीन लक्ष अठ्यात्तर रूपये किंमतीचा 17.38 मेट्रीक टन साठा जप्त केला. त्याचप्रमाणे अकोला जिल्ह्यात मुर्तीजापूर येथील सुजीत प्रल्हाद धुत याचेकडुन 1.5 क्वींटल बोगस रासायनिक खत, व सोबत दस्तऐवज असलेले चारचाकी वाहन जप्त करण्यात आले. या मुद्देमालाची किंमत अंदाज चार लक्ष चौपन्न हजार इतकी आहे. या दोनही बोगस रासायनिक खत विक्रेत्याविरुध्द कृषी विभागाने पोलीसात गुन्हा दाखत केला असून पोलीस या प्रकरणाचा पुढील तपास करीत आहेत.विभागामध्ये भरारी पथकाने 5498वितरक/विक्रेते पैकी 1012 विक्रेत्याकडे रासायनिक खत तपासनी
केली. यामध्ये अमरावती जिल्ह्यात उणिवा, त्रुटी आढळलेल्या दोन दुकांनदारांना विक्रीबंद करण्याचे आदेश देण्यात आले. बियाणे विक्री संदर्भातही भरारी पथकाने 1035 बियाणे विक्रेत्यांच्या दुकानाची तपासनी केली या
तपासणी मध्ये बुलडाणा जिल्ह्यात 60, अकोला जिल्ह्यात 7, वाशिम जिल्ह्यात 2, अमरावती जिल्ह्यात 6 तर
यवतमाळ जिल्ह्यात 47 बियाणे विक्रेत्यांकडे उणिवा व त्रृटी आढळल्यामुळे 122 विक्रेत्यांना बियाणे विक्रीबंद
ठेवण्याचे आदेश दिले असून अमरावती जिल्ह्यातील दोन बियाणे विक्री परवाने निलंबीत करण्यात आले आहेत.
किटकनाशकासंबंधी विभागात 4636 वितरक/विक्रेत्यांपैकी 305 दुकानाची तपसणी करण्यात आली. या तपासणीत अमरावती जिल्ह्यातील दोन दुकानात उणिव, त्रृटी आढळल्यामुळे त्यानाही विक्रीबंधीचे आदेश दिले
आहेत. तसेच अमरावती जिल्ह्यात बोगस किटक नाशकासंबंधी एका प्रकरणात 127 लिटर किटक नाशकाचा
साठा जप्त करण्यात आला असून त्याची अंदाजी किंमत 0.66 लक्ष रुपये इतकी असल्याचे कृषी विभागाने
कळविले आहे.