मुंबई, दि. १८ – बँकाकमध्ये झालेल्या शक्तीशाली बाँबस्फोटातून अभिनेते रितेश व जेनेलिया देशमुख थोडक्यात बचावले आहेत.
ज्या मंदिराजवळ हा स्फोट झाला त्यावेळी ते दोघे तेथून अवघ्या काही अंतरावर असलेल्या मॉलमध्ये होते. जेनेलियाने या स्फोटाची माहिती देतानाच आपण सुरक्षित असल्याचेही म्हटले.
‘ आम्ही सध्या ज्या मॉलमध्ये आहोत त्यासमोर बाँबस्फोट झाला आहे. मदत कार्यासाठी आलेल्या यंत्रणांच्या सायरनचे आवाज इथे स्पष्ट ऐकू येत आहेत. इथे (मॉलमध्ये) आम्ही सुरक्षित असलो तरी या स्फोटात ज्यांना प्राण गमवावे लागले त्यांच्याबद्दल खूप दु:ख होत आहे’ असे ट्विट जेनेलियाने केले आहे.
काल संध्याकाळी हिंदू मंदिर एरावनच्या बाहेर झालेल्या या स्फोटात २७ ठार तर अनेक जण जखमी झाले आहेत. ब्रह्माचे हे मंदिर बाजारपेठेतून जाणा-या मुख्य रस्त्यावर असून त्याच्या भोवती तीन मुख्य शॉपिंग मॉल्स आहेत. त्यापैकी एका मॉलमध्येच रितेश -जेनेलिया शॉपिंग करत होते.

मुंबई – ‘याद राखा, बाबासाहेब पुरंदरे यांना हात जरी लागला तरी महाराष्ट्रात तांडव करेन’, असा इशारा मनसे अध्यक्ष राज ठाकरे यांनी आज दिला. बाबासाहेबांना ‘महाराष्ट्र भूषण’ पुरस्कार देण्यास विरोध करण्यामागे शरद पवार आणि भाजपमधील काही मंत्र्यांचं गलिच्छ राजकारण आहे, असा आरोपही राज यांनी केला.
बाबासाहेब पुरंदरे यांना उद्या राजभवनात छोटेखानी समारंभात ‘महाराष्ट्र भूषण’ पुरस्कार प्रदान करण्यात येणार आहे. पुरंदरे यांना हा पुरस्कार देण्यास अनेक संघटनांनी केलेला विरोध तसेच पुरस्कार वितरण सोहळा उधळून लावण्याची दिलेली धमकी या पार्श्वभूमीवर राज यांनी आज मैदानात उतरत पुरंदरेविरोधकांना ‘आवाज’ दिला.
‘राष्ट्रवादी काँग्रेस पक्ष आणि भाजपमधीलच काही मंत्र्यांनी मिळून हे सगळं कुभांड रचलं आहे. मला फडणवीस यांची बाजू घ्यायची नाही मात्र ते खुर्चीवर बसल्यापासूनच हे राजकारण सुरू झाले आहे. पवारांना भाजपमधील कोण कोण सामिल आहेत ते मला महित आहेत पण मी त्यांची नावे सांगणार नाही. फडणवीस ज्युनियर आहेत. ब्राम्हण आहेत. म्हणूनच हे जातीचं राजकारण चाललंय. पवारच विष कालवण्याचे काम करत आहेत’, अशी तोफ राज यांनी डागली.
बाबासाहेबांच्या शिवचरित्रात जिजाऊंचा अपमान झाल्याचा साक्षात्कार आता ५० वर्षांनतर कसा काय झाला?, असा सवाल राज यांनी केला. शरद पवार यांनी बाबासाहेबांचा सत्कार केला होता. आत्ता आत्ता महाराष्ट्र भूषण पुरस्कार जाहीर झाल्यानंतरही पवारांची कन्या सुप्रिया सुळे यांनी त्यांचं अभिनंदन केलं. अजित पवारही त्यांचा आदर करतात. मग आता अचानक हे घुमजाव कशासाठी?, असा सवालही राज यानी विचारला. केवळ एखाद्या वाक्यासाठी संपूर्ण शिवचरित्रावर आक्षेप घेणे योग्य नाही. त्यातही जे आक्षेप आहेत त्यावर खुली चर्चा होऊ शकते. त्यासाठी एवढा गदारोळ माजवण्याची गरज नाही, असे राज यांनी ठणकावले. राज यांनी कृष्णनीतीचाही यावेळी दाखला दिला. कृष्णाच्या १६ हजार बायका होत्या यावर चर्चा करत बसायचं की कृष्णनीतीचं आचरण करायचं?, असा सवाल राज यांनी केला.
जितेंद्र आव्हाड यांचाही राज यांनी समाचार घेतला. पवारांच्या गलिच्छ राजकारणामुळेच जितेंद्र आव्हाड यांच्यात एवढं बोलण्याची हिम्मत आली आहे. पवारांनीच आव्हाड यांना फूस लावली आहे, असा आरोप राज यांनी केला. माझ्या आजोबांच्या पुस्तकातील दाखले आव्हाडांनी देऊ नयेत, असेही राज यांनी सुनावले.
नेमाडे यांच्यावरही टीका
पुरंदरे यांना पुरस्कार देण्यास विरोध करणारे ज्ञानपीठप्राप्त भालचंद्र नेमाडे यांच्यावरही राज यांनी टीका केली. ज्ञानपीठ पुरस्कार मिळाल्यानंतर कसं वागावं याचे धडे नेमाडेंनी कुसुमाग्रज वा विंदांच्या आचरणातून घ्यायला हवेत, असा टोला राज यांनी लगावला. नेमाडे यांना ज्ञानपीठ देण्यासही विरोध झाला होता तरीही त्यांनी तो पुरस्कार स्वीकारलाच ना, असा मुद्दाही राज यांनी उपस्थित केला.

मुंबई – हिंदी सिनेसृष्टीचे महानायक अमिताभ बच्चन यांनी व्याघ्र संरक्षणासाठी काम करण्याचा महाराष्ट्र सरकारचा प्रस्ताव मान्य केला आहे. यापुढे अमिताभ बच्चन महाराष्ट्राच्या वाघ संरक्षण योजनेचे ब्रॅंड अँबॅसिडर असतील. राज्याचे वनमंत्री सुधीर मुनगंटीवार यांनी अमिताभ बच्चन आणि सचिन तेंडुलकर यांना पत्र लिहून व्याघ्र संरक्षण योजनेचे ब्रँड अँबॅसिडर होण्याचे निमंत्रण दिले होते. वाघांबद्दल लोकांमध्ये जनजागृती निर्माण करुन व्याघ्र संरक्षण आणि पर्यटनाला चालना मिळावी यासाठी आपण व्याघ्र संरक्षण योजनेचे अँबॅसिडर व्हावे असे मुनगंटीवार यांनी पत्रात म्हटले होते.

पुणे, दि. १० – वाहतूक सुरळित ठेवण्याचं तसेच चालकांना शिस्त लावण्याचं काम करणा-या वाहतूक पोलीसालाच पळवण्याचा प्रयत्न करण्याचा प्रकार पुण्याच घडला आहे. मयूर मंडले हे वडगाव पुलाजवळ आपली ड्युटी करत होते. त्यावेळी एका कारला त्यांनी थांबवले, व कागदपत्रांची विचारणा केली. कुठलही कागदपत्रे देण्यास चालकाने नकार दिल्यामुळे कंडले गाडीत बसले आणि त्यांनी गाडी पोलीस स्टेशनला घेण्यास सांगितले. यावेळी या गाडीच्या चालकाने गाडी भरधाव वेगात मुंबईच्या दिशेने दामटली आणि मंडले यांनाच मारहाण करण्याची धमकी दिली. मंडले यांनी प्रसंगावधान राखून वॉकीटॉकीवरून हा प्रकार आपल्या सहका-यांना कळवला. लगेच त्यांच्या सहका-यांनी दुस-या गाडीतून या कारचा पाठलाग केला आणि त्यांना चांदणी चौकाजवळ पकडले. या गाडीतल्या दोघाजणांना पोलीसांनी ताब्यात घेतले असून पुढील चौकशी सुरू आहे.