नवी दिल्ली, दि. २८ – परदेशातून देणग्या स्वीकारणा-या गैरसरकारी संस्थांवर (एनजीओ) मोदी सरकारने कारवाईचा धडाका सुरु केला असून सोमवारी रात्री सरकारने तब्बल ८,९७५ एनजीओंचे परवाने रद्द केले आहेत. मोदी सरकारच्या या आक्रमक पवित्र्यांनी एनजीओ चालवणा-यांचे धाबे दणाणले आहेत.
काही दिवसांपूर्वी मोदी सरकारने ग्रीनपीस संघटनेच्या विदेशातून मिळणा-या मदतीवर निर्बंध घातले होते. त्यानंतर केंद्रीय गृहमंत्रालयाने भारतातील १०, ३४३ एनजीओंना नोटीस पाठवत २००९ -१०, २०१० -११ आणि २०११ -१२ या आर्थिक वर्षातील रिटर्न सादर करायला सांगितले होते. यात परदेशातून मिळालेल्या देणगीचा नेमका आकडाही समजणार होता. यातील फक्त २२९ एनजीओंनी त्यांचा वार्षिक लेखाजोखा गृहमंत्रालयाला सादर केला आहे. गृहमंत्रालयाच्या नोटिसीला उत्तर न देणा-या ८, ९७५ एनजीओंचे परवाने रद्द करण्यात आल्याची घोषणा मंगळवारी रात्री उशीरा करण्यात आली. यातील ५१० एनजीओ अशा आहेत ज्यांना नोटीस पाठवण्यात आली मात्र ती कोणीच स्वीकारली नसल्याने नोटीस परत आली.

यवतमाळ, दि. २७ – आयएपिएल क्रिकेट स्पर्धेत अनेकांनी सट्टा लावल्याची माहिती मिळताच उपविभागीय पोलीस अधिकाºयांच्या पथकाने प्रभात नगर येथील अड्ड्यावर धाड मारली. यावेळी एका आरोपीस अटक करून ५९ हजार रुपयाचे साहित्य जप्त केले.
सुनील भास्कर हमदापूरे (३६) रा. प्रभात नगर रेणुका मंगल कार्यालयासमोर यवतमाळ असे आरोपीचे नाव आहे. रविवारी कोलकाता नाईट रायडर्स विरूद्घ राजस्थान रॉयल्स आणि दिल्ली डेअरडेव्हिलस विरूद्घ रॉयल चॅजेंजर्स बंगळुरू याच्यात क्रिकेट सामना सुरू होता. या सामन्यावर सट्टा सुरू असल्याची गुप्त माहीती यवतमाळ येथील उपविभागीय पोलीस अधिकाºयांचा पथकाला मिळाली होती. त्यावरून पथकाने हमदापूरे यांनी भाड्याने घेतलेल्या सोनु घोडे यांच्या घरी सुरू असलेल्या सट्ट्यावर धाड टाकली. यामध्ये टीव्ही , लॅपटॉप, मोबाईल, ५ हजार ३०० रुपये नगदी असा एकुण ५९ हजार ३०० रुपयाचा मुद्देमाल जप्त केला. याप्रकरणी पोलिसांनी मुंबई जुगार कायद्या अंतर्गत ४,५ अंतर्गत गुन्हा दाखल केला असून सुनील हमदापूरेला अटक केली. ही कार्यवाही उपविभागीय पोलीस अधिकारी राहुल मदणे, वडगाव रोडचे सहाय्यक पोलीस निरीक्षक सारंग मिराशी, इकबाल शेख, ऋतुराज मेंढवे, संतोष मडावी, प्रमोद मडावी यांनी केली.

नवी दिल्ली- परदेशातील काळा पैसा १०० दिवसात परत आणू, असे आश्वासन देऊन सत्तेवर आलेल्या मोदी सरकारने एक पैसाही आजपर्यंत परत आणला नाही. मात्र मागील वर्षी झालेल्या आर्थिक व्यवहारांमध्ये देशात आणि परदेशात मिळून सात हजार ८०० कोटी रुपयांचा काळा पैसा असल्याचे अर्थ मंत्रालयाच्या ताज्या अहवालामध्ये स्पष्ट करण्यात आले आहे.
या काळातील संशयास्पद आर्थिक व्यवहारांची संख्या ही प्रचंड असल्याचे आर्थिक गुप्तचर संस्थेच्या चौकशीत उघडकीस आले आहे. देशांतर्गत केलेल्या या कारवाईत हजारो कोटी जप्त करण्यात आले असले आणि गैरप्रकार उघडकीस आणले असले तरी परदेशातील काळ्या पैशाचा प्रश्न मात्र अद्यापही अनुत्तरितच आहे.
अर्थ मंत्रालयाच्या अहवालानुसार, मागील वर्षी केलेल्या कारवाईद्वारे प्राप्तिकर विभागाने एकूण ७,०७८ कोटी रुपयांच्या, तर सीमा शुल्क आणि सेवा कर विभागाने ७५० कोटी रुपयांच्या काळ्या पैशाचा छडा लावला आहे. या काळातील संशयास्पद आर्थिक व्यवहारांची संख्या ही प्रचंड असल्याचे आर्थिक गुप्तचर संस्थेच्या (एफआययू) चौकशीत उघडकीस आले आहे.
देशभरातील विविध आर्थिक संस्थांकडून मिळालेल्या संशयास्पद आर्थिक व्यवहारांबाबतच्या अहवालांचा (एसटीआर) अभ्यास अर्थमंत्रालयाच्या निदर्शनाखाली केला असल्याचे अर्थ मंत्रालयातर्फे सांगण्यात आले. तसेच वसुली संचनालयानेही सुमारे २० कोटी रुपयांच्या आर्थिक गुन्ह्यांचा शोध लावला असून, १७ कोटी रुपयांची मालमत्ता जप्त केली आहे.
एफआययूने यासाठी अत्याधुनिक तंत्रज्ञानाची मदत घेतली होती. पीटीआयला हा अहवाल प्राप्त झाला असून, या अहवालात मागील वर्षभरात माहिती तंत्रज्ञान विभागाने सुमारे १६३ कोटींची मालमत्ता ताब्यात घेतल्याचे म्हटले आहे. तसेच २०१३- १४ या आर्थिक वर्षामध्ये सक्तवसुली संचनालयाने १०५ गुन्हेगारी स्वरूपाच्या तक्रारी दाखल केल्या आहेत. २०१२- १३ च्या तुलनेत हे प्रमाण शंभर टक्‍क्‍याने वाढल्याचे निदर्शनास आले आहे.

भोपाळ, दि. २७ – मध्यप्रदेशमधील सागर जिल्ह्यातील ११ वर्षाच्या ताराने घरात वडिलांनी स्वच्छतागृह बांधावा यासाठी दोन दिवसासाठी उपोषण केले. पैशाअभावी ताराच्या वडिलांना स्वच्छतागृह बांधता येत नव्हते, अखेरीस स्थानिक प्रशासनाने आर्थिक मदत दिल्याने ताराच्या घरातील स्वच्छतागृहाचे काम सुरु झाले आहे. सागर जिल्हा प्रशासनाने स्वच्छता मोहीमेसाठी ब्रँड अ‍ॅम्बेसेडर म्हणून ताराची नियुक्ती केली आहे.
सागर जिल्ह्यातील किरोड गावात राहणारी तारा बन्सल ही गावातील सरकारी शाळेत सहावी इयत्तेत शिकते. काही दिवसांपूर्वी ताराच्या शाळेत एका समाजसेवी संस्थेने स्वच्छतेसंदर्भात जनजागृती अभियान राबवला होता. उघड्यावर शौचालयास जाऊ नये असा संदेशही या अभियानातून देण्यात आला होता. तारा या अभियानामुळे प्रभावित झाले व तिने घरात स्वच्छतागृह बांधण्यासाठी तगादा लावला. ताराचे वडिल महेश आणि काका पुरुषोत्तम हे दोघे शेतमजूर म्हणून काम करतात. आर्थिक परिस्थिती हलाखीची असल्याने बन्सल कुटुंबाच्या घरात स्वच्छतागृह नव्हते. यामुळे तारा व घरातील अन्य महिलांना उघड्यावर शौचास जावे लागत होते. चिमुकल्या ताराने या विरोधात लढा देण्याचा निर्धार करत दोन दिवस अन्नाचा एक कणही घेतला नाही. वडिलांनी आधी घरात शौचालय बांधावे असे तिचे म्हणणे होते. मुलीच्या हट्टाखातर महेश बन्सल यांनी शौचालयाचे बांधकाम सुरु केले. मात्र पैशाअभावी ते बंद पडले. अखेर जिल्हा प्रशासनाला या घटनेची माहिती समजली व त्यांनी ताराच्या घरी जाऊन शौचालय बांधण्यासाठी मदत दिली. पहिल्या टप्प्यात आम्ही सहा हजार रुपये दिले असून उर्वरित पैसे बांधकाम पूर्ण झाल्यावर देऊ असे स्थानिक अधिका-यांनी सांगितले.

नवी दिल्ली – नेपाळसह उत्तर भारतात आलेल्या भूकंपाच्या पार्श्वभूमीवर मदतकार्याचा आढावा घेण्यासाठी पंतप्रधान नरेंद्र मोदी यांनी उच्चस्तरीय बैठक बोलावली होती. या बैठकीत पंतप्रधान नरेंद्र मोदी यांनी शोधमोहीम आणि मदतकार्य वाढवण्याचे निर्देश अधिकाऱ्यांना दिले. मदतकार्यात लागलेल्या विविध विभागांनी या बैठकीत त्यांनी केलेल्या आतापर्यंतच्या कामाची माहिती दिली. भारत आणि नेपाळमध्ये झालेले नुकसान तसेच या ठिकाणी सुरु असलेल्या मदतकार्याची माहिती यावेळी देण्यात आली. तसेच रविवारी आलेल्या भूकंपासंदर्भातील माहितीही यावेळी देण्यात आली आहे.
हवाई मार्ग तसेच रस्तामार्गाने मदतकार्याचा वेग वाढवावा, असे निर्देश पंतप्रधानांनी यावेळी दिले. भूकंपामुळे अडकलेल्यांना तातडीने बाहेर काढा, असे पंतप्रधानांनी यावेळी अधिकाऱ्यांना सांगितले. मदतकार्यात लागलेल्या विविध विभागांमध्ये समन्वय राखला जावा, यावरही मोदी यांनी जोर दिला. भूकंपाचा फटका बसलेल्या ठिकाणी अन्न, पाणी, दूध आणि दूध पावडर तात्काळ पोहोचवावे, असे मोदी यांनी सांगितले.या उच्चस्तरीय बैठकीत केंद्रीयमंत्री अरुण जेटली, परराष्ट्रमंत्री सुषमा स्वराज, गृहमंत्री राजनाथ सिंह, संरक्षणंत्री मनोहर पर्रिकर तसेच विविध विभागाचे उच्चाधिकारी उपस्थित होते

यवतमाळ – मारहाण केल्याने युवकाने आत्महत्या केल्याची घटना शनिवारी सायंकाळी बोरगाव लिंगा येथे घडली. यावेळी आरोपीच्या अटकेसाठी नातेवाईकांनी युवकाच्या मृतदेहासह लाडखेड पोलिस ठाण्यावर धडक दिली.
विशाल विजय जाधव (२२) रा. बोरगाव लिंगा असे मृतकाचे नाव आहे. शनिवारी २५ एप्रिल रोजी सदर युवक घरी असतांना सचिन सुधाकर बोरकर (३५), अंकुश चक्रधर बोरकर यांनी त्याला घरून हर्षा महादेव घोडसर या हीलेच्या घरी नेले. त्यानंतर विष्णु लांडे याच्या शेतात नेऊन सचिन बोरकर, अंकुश बोरकर, प्रविण लांडे, बिपीन विष्णु लांडे, विष्णु लांडे यांनी बेदम मारहाण केली. मारहाण केल्याने अपमाणित झालेल्या विशालने गावाशेजारी असलेल्या गुणवंत दिवाकर ठोकळ यांचे शेतात झाडाला गळफास घेऊन आत्महत्या केली. आज रविवारी शवविच्छेदनानंतर नातेवाईक लाडखेड पोलिस ठाण्यात गेले असता ठाणेदारांनी तक्रार न घेताच त्यांना परत पाठविले. त्यामुळे संतप्त झालेल्या गावकºयांनी मृतदेहासह लाडखेड पोलीस ठाण्यावर धडक दिली. जो पर्यंत मारहाण करणाºयाविरूद्घ गुन्हे दाखल होत नाही तो पर्यंत मृतदेह नेणार नाही असा पवित्रा घेतला होता. त्यामुळे पोलिसांनी सात जणांविरूद्घ गुन्हे दाखल केले असून तपास सुरू आहे.

कोल्हापूर – ‘ख्वाडा’ आणि ‘धग’ या पुरस्कारविजेत्या मराठी चित्रपटांचे तरुण वेशभूषाकार ​विजय मारुती सामाने (२८) यांनी गळफास लावून आत्महत्या केली. ही घटना गुरुवारी दुपारी अडीच वाजता उघडकीस आली. सामाने यांच्या पश्चात वडील, पत्नी, आठ महिन्यांची मुलगी, दोन बहिणी असा परिवार आहे.
सामाने यांचे देवल क्लबजवळ ड्रेपरीचे दुकान आहे. दुकानाशेजारी असलेल्या डान्स स्कूलमधील विद्यार्थ्यांशी त्यांनी दुपारी साडेबाराच्या सुमारास चेष्टामस्करीही केली. त्यानंतर ते दुकानात झोपी गेले. दुपारी अडीचच्या सुमारास विद्यार्थ्यांनी विजय यांच्या दुकानाचे शटर उघडले असता, ते गळफास घेतल्याच्या स्थितीत आढळले. विद्यार्थ्यांनी त्यांना सीपीआरमध्ये उपचारास हलविले. पण, उपचारापूर्वीच विजय यांचा मृत्यू झाला. विजय यांनी १०० चित्रपटांत वेशभूषाकार म्हणून काम केले आहे. राष्ट्रीय पुरस्कारप्राप्त चित्रपट ‘धग’साठी वेशभूषाकार म्हणून स्पर्धेसाठी नामांकन झाले होते. मराठीतील पुरस्कारप्राप्त ‘ख्वाडा’ चित्रपटासाठीही वेशभूषाकार म्हणून काम केले होते. यासाठी त्यांना नामांकनही मिळाले होते. सावित्रीच्या लेकी, संभा, बंजारा, राजमाता जिजाऊ, हायकमांड, ढोलकी, मनातल्या उन्हात, चांदी, घरवाली हुशार या चित्रपटांसाठी वेशभूषाकार म्हणून त्यांनी काम पाहिले होते. त्यांच्या निधनाने चित्रपट व नाट्य क्षेत्रातील अनेकांना मोठा धक्का बसला आहे.

यवतमाळ;दि. २५ – येथील महर्षी विद्या मंदिर शाळेतील पाचवीमधील विद्यार्थीनी मुद्रा विनायक गोहाड हीने शैक्षणिक सत्रात चार पदके प्राप्त केली.
शैक्षणिक सत्र २०१४-१५ या वर्षात मुद्रा गोहाड हीने विविध परिक्षेत्र घवघवित यश संपादन करून पदके पटकाविली. सिल्व्हर झोन फाऊंडेशन दिल्लीतर्फे घेण्यात आलेल्या इंटरनॅशनल आॅलिम्पीयाड आॅफ इंग्लिश, इंटरनॅशनल आलिम्पियाड आॅफ सायन्स या परिक्षांमध्ये सिल्व्हर मेडल मिळविले आहे. तर राष्टÑभाषा प्रचार समिती वर्धाद्वारे घेण्यात आलेल्या राष्टÑभाषा प्राथमिक परीक्षेत्र शळेतून प्रथम येण्याचा मान मिळविला आहे. तीने आपल्या यशाचे श्रेय आई-वडील व शिक्षकांना दिले आहे. तीच्या यशाबद्दल सर्वत्र कौतुक होत आहे.

नागपूर – उत्तर भारतात भूकंपाचे तीव्र झटके जाणवले असून काही ठिकाणी सार्वजनिक मालमत्तेचे नुकसान झाले आहे. या भूकंपाचे सौम्य धक्के महाराष्ट्रातील विदर्भात जाणवले आहे. उपराजधानी नागपूर शहरही भूकंपाच्या आवाजाने हादरले. त्यामुळे नागरिकांनी सर्वत्र चर्चा सुरु केली असून हे भूकंपाचेच धक्के असल्याचे स्पष्ट झाले आहे.
उत्तर भारतील बिहार, उत्तरप्रदेश, झारखंड येथे ७.५ रिस्टर स्केलचा तीव्र भूकंपाचा झटका बसल्याने देशभरात एकच धांदल उडाली आहे. सुरुवातीला जमिन हादरुन गूढ आवाज झाला. त्यामुळे नागिराकांत भितीचे वातावरण निर्माण झाले. भूकंपाच्या आवाजाने नागरिक घर आणि ऑफिसमधून सैरा-वैरा पळत मोकळ्या जागी येऊन स्वत:चा बचाव करत होते. जवळपास दीड मिनिटे हा भूकंपाचा थरार नागरिकांनी अनुभवला. नेपाळ हे भूकंपाचा केंद्रबिंदू मानण्यात येत असून महाराष्ट्रातील विदर्भातही भूकंपाचा सौम्य हादरा बसला आहे. दरम्यान भूंकपाच्या धक्क्यांनंतर लातुरमधील किल्लारी भूकंपाच्या आठवणी ताज्या करत नागरिकांत चर्चाच-चर्चा सुरु झाली आहे.

यवतमाळ, दि. २० – खाद्य तेलाचे व मिरचीचे सॅम्पल पास करून देण्यासाठी ५१ हजार रुपये लाच स्विकारणाºया अन्न सुरक्षा अधिकाºयास एसीबीच्या पथकाने रंगेहात पकडले. आज सोमवारी दुपारी अन्न व औषध प्रशासन विभागाच्या सहायक आयुक्ताच्या कार्यालय ही कारवाई केली आहे.
प्रभाकर निवृत्ती काळे (४२) असे लाचखोर कर्मचाºयाचे नाव आहे. येथील अन्न व औषध प्रशासन विभागात ते अन्न सुरक्षा अधिकारी म्हणून कार्यरत होते. आर्णी येथील एका बार अ‍ॅन्ड रेस्टॉरंट मधील खाद्य तेलाचे व मिरचीचे घेतलेले सॅम्पल पास करून देतो. त्यासाठी ५१ हजार रुपये लाचेची मागणी या कर्मचाºयांने तक्रारदाराकडे केली होती. तसेच आर्णीतील इतर सात बार अ‍ॅड रेस्टॉरंट मालक तुझे चांगले परिचयाचे असल्याने त्यांच्याकडून वार्षिक हप्त्याचे पैसे जमा करून घेऊन ये असे फर्मान सोडले होते. नाही तर तुला याचा त्रास होईल अशी तंबीही दिली होती. या प्रकरणी बार अ‍ॅड रेस्टॉरंट मालकाने यवतमाळ येथील लाच लुचपत प्रतिबंधक विभागाकडे तक्रार दिली. त्यावरून पथकाने स्थानिक अन्न व औषध प्रशासन विभागाच्या कार्यालयात सापळा रचला होता. दरम्यान पंचासमक्ष ५१ हजार रुपये लाच स्विकारताना काळे यांना रंगेहात पकडले. या प्रकरणी पोलिसांनी गुन्हा दाखल केला असून तपास सुरू आहे. ही कारवाई लाचलुचपत प्रतिबंधक विभागाचे पोलीस उपअधिक्षक सतीश देशमुख, पोलीस निरीक्षक नितीन लेव्हरकर, नंदकुमार जामनकर, गिरी, इंगोले, अमित जोशी, अनिल राजकुमार, खेडकर, ढोणे, महल्ले, शेंडे, मेश्राम, चिरडे, कोकेवार यांनी केली.