विशाखापट्टणम – भारतीय नौदलाच्या पाणबुडया, युध्दनौकांना होणा-या अपघातांची मालिका कायम असून, शनिवारी संध्याकाळी विशाखापट्टणम येथील नौदलाच्या युध्दनौका बांधणी तळावर बांधकामवस्थेत असलेल्या एका अणवस्त्रपाणबुडीला अपघात झाला. या दुर्घटनेत एका कंत्राटी कामगाराचा मृत्यू झाला असून, दोन कामगार जखमी झाले आहेत.
आयएनएस अरिहंत वर्गातील ही अणवस्त्र पाणबुडी आहे. पाणबुडीची दाब चाचणी सुरु असताना, हायड्रायुलिस टाकीचे झाकण उडून कामगाराच्या अंगावर पडले. त्यात या कामगाराचा मृत्यू झाला अशी माहिती डीआरडीओचे प्रमुख अविनाश चंदर यांनी दिली. अमर असे या कामगाराचे नाव असून तो २४ वर्षांचा होता. अमजद खान आणि विष्णू हे दोन अन्य कंत्राटी कामगार अपघातात गंभीर जखमी झाले असून, त्यांना येथील खासगी रुग्णालयात दाखल करण्यात आले आहे.
या दुर्घटनेत अण्विक पाणबुडीचे नुकसान झालेले नाही तसेच पाणबुडी विकसित करण्याच्या कार्यक्रमाला धक्का लागलेला नाही अशी माहिती चंदर यांनी दिली. डीआरडीओने या अपघाताच्या चौकशीचे आदेश दिले आहे.शुक्रवारी संध्याकाळी मुंबईच्या माझगाव गोदीत आयएनएस कोलकाता श्रेणीतील ‘यार्ड-७०१’ विनाशिकेवर स्फोट होऊन एका अधिका-यांचा मृत्यू झाला होता. त्याआधी आयएनएस सिंधुरत्न पाणबुडीच्या चाचण्या सुरु असताना, झालेल्या अपघातात दोन नौदल अधिका-यांचा मृत्यू झाला होता.