अतुल कुलकर्णी हा परिपूर्णतेसाठी ओळखला जाणारा कलाकार आहे. प्रत्येक चित्रपटातील आपल्या भूमिकेला योग्य तो न्याय देण्यासाठी आणि त्या भूमिकेत पूर्णपणे उतरण्यासाठी तो जीवाचे रान करतो. त्याच्या या झपाटलेपणालाही एक सूत्र आहे आणि आपल्या या कलेत सर्वोत्तम उतरवण्यासाठी आवश्यक समर्पणही आहे. ‘हॅप्पी जर्नी’ या नवीन चित्रपटातील त्याच्या नव्या भूमिकेतही हीच बाब नव्याने समोर आली आहे. ‘हॅपी जर्नी’ची निर्मिती एव्हरेस्ट एन्टरटेन्मेंटने केली असून त्याचे सध्या चित्रीकरण सुरू आहे. या चित्रपटाचे चित्रीकरण पुणे, गोवा, वेल्हे आणि मांणगाव अशा विविध ठिकाणी केले जात आहे. या नव्या चित्रपटासाठी एक विशेष गाडी(हाऊस ऑन व्हिल्स) तयार केली गेली आहे. इमरान यांनी एका टेम्पो ट्रॅव्हलरचे रूपांतर अत्यंत कौशल्याने एका ‘काफिल्या’मध्ये केले आहे. इमरान यांनी प्रख्यात कार डिझायनर दिलीप छाब्रीया यांच्याकडे सहाय्यक म्हणून काम केले आहे. अतुल कुलकर्णीला काही ही गाडी चालवता येत नव्हती. पण चित्रपटात मात्र त्याला ही गाडी मोठ्या प्रमाणावर चालवायची होती. आपल्या अभिनयात सहजता यावी आणि कोणत्याही अडचणीत गाडी चालवता यावी, यासाठी अतुलने गाडीचे प्रशिक्षण घेतले. केवळ प्रशिक्षण घेऊनच तो थांबला नाही तर ती आरामात चालवता यावी, म्हणून अतुलने पुणे ते गोव्यादरम्यान या गाडीतून अनेक फे-याही मारल्या. रस्त्यात काही ठिकाणी थांबून त्याने भरपूर सराव केला. अतुलने आपल्या भूमिकेसाठी मेहनत घेतली. आजच्या कलाकारांमध्ये अत्यंत अभावाने आढळणारा असा हा गुण आहे. दिग्दर्शकाने या चित्रपटातील गादी चालवण्याच्या दृश्यांच्या चित्रीकरणाला गोवा येथे सुरूवात करेपर्यंत अतुल ही गाडी चालविण्यामध्ये वाकबगार झाला होता. चित्रपटाशी संबंधीत सर्वच तंत्रज्ञांसाठी हा एक आश्चर्याचा सुखद असा धक्का होता. प्रिया बापट आणि पल्लवी सुभाष या सहकलाकारांबरोबरचे चित्रीकरण त्यामुळे अधिक सुलभ झाले. हा चित्रपट सप्टेंबर २०१४ मध्ये प्रदर्शित होत आहे.