यवतमाळ , दि. ३१ – जिल्ह्यात राळेगाव घाटंजी तालुक्यात झालेल्या दोन विविध अपघातात महिलेसह पोलीस पाटील ठार झाल्याची घटना घडली.
युवकाने आपले वाहन भरधाव व निष्काळजीपणे चालवून महिलेला धडक दिली. यात गया भोयर ही गंभीररित्या जखमी झाली. ही घटना राळेगाव तालुक्यातील अंतरगाव येथे घडली. अपघातात गया भोयर ही अपघातात जखमी झाल्यानंतर तिला उपचारासाठी रुग्णालयात दाखल करण्यात आले. मात्र उपचाराला प्रतिसाद न मिळाल्याने महिलेचा मृत्यू झाला. याप्रकरणी रामू कृष्णाजी भोयर (४०) रा. धानोरा याने राळेगाव पोलीस ठाण्यात तक्रार दिली. त्यावरून किशोर संजय जिरे (२१) रा. राळेगाव याच्याविरुद्ध गुन्हा नोंद केला आहे. तसेच उभ्या असलेल्या ट्रक्टरवर दुचाकी आदळल्याने झालेल्या अपघातात कोटी येथील पोलीस पाटील यांचा मृत्यू झाला. ही घटना घाटंजी-रंझा मार्गावर घडली. अनंत वासुदेव अक्कलवार (४५) असे मृताचे नाव आहे. विजय शिवराम अक्कलवार हा जखमी झाला. काल रात्री दोघेही दुचाकीने घाटंजी येथून कोचीकडे जात होते. दरम्यान ट्रक्टर क्रमांक एमएच २९ / ३५०१ हा रस्त्यावर उभा होता. त्यामुळे ट्रक्टर न दिसल्यामुळे दुचाकी आदळली. यात अनंत अक्कलवार यांचा घटनास्थळीच मृत्यू झाला तर विजय जखमी झाला. त्याला उपचारासाठी यवतमाळ येथील रुग्णालयात दाखल करण्यात आले. अपघात झाल्याचे लक्षात येताच चालक घटनास्थळावरून पसार झाला. याप्रकरणी रोशन अक्कलवार याने घाटंजी पोलीस ठाण्यात तक्रार दिली. त्यावरून पोलिसांनी ट्रॅक्टर चालकाविरुद्ध गुन्हा नोंद केला आहे.