नवी दिल्ली – अल्पवयीन मुलांकडून महिलांवर होणारा अत्याचार, बलात्कारांच्या संख्येत गेल्या काही वर्षात मोठी वाढ झाली आहे. अल्पवयीन मुलांकडून महिलांवर होणा-या अत्याचारात १३२ टक्क्यांपर्यत वाढ झाल्याचे अहवालात दिसून येत आहे.
राष्ट्रीय गुन्हे नोंदणी विभागाच्या अहवालानुसार २०१३मध्ये अल्पवयीन मुलांकडून महिलांवर मोठ्या प्रमाणात अत्याचार केल्याच्या घटना घडल्या. २०१३ मध्ये अल्पवयीन मुलांकडून महिलांवर झालेल्या अत्याचाराच्या घटनांचे प्रमाण १३२.३ टक्के होते तर विनयभंगाच्या घटनांचे प्रमाण ७०.३ टक्के तर बलात्काराच्या ६०.३ टक्के घटना घडल्या. भारतीय दंड विधानानुसार गुन्हेगार ठरवण्यात आलेली ६६.३ टक्के अल्पवयीन मुले ही १६-१८ वयोमर्यादेतील असतात. २०१३ मध्ये ३१ हजार ७२५ विविध गुन्ह्यांच्या प्रकरणांमध्ये अल्पवयीन मुलांचा समावेश होता तर त्याआधी २०१२ मध्ये हेच प्रमाण २७ हजार ९३६ इतके होते. २०१२ च्या तुलनेत २०१३ मध्ये हे प्रमाण १३.६ टक्क्यांनी वाढले. विविध गुन्ह्यांमध्ये सहभाग असलेल्या एकूण ४३हजार ५०६ अल्पवयीन मुलांपैकी आठ हजार ३९२ ही अशिक्षित आहेत तर १३ हजार ९८४ मुलांनी केवळ प्राथमिक शिक्षण घेतले आहे.