ठाणे- एका अल्पवयीन मुलीचे अपहरण करुन तिच्यावर दोघांनी बलात्कार केल्याची घटना डोंबिवलीमध्ये उघडकीस आली आहे. याप्रकरणी दोघांना मानपाडा पोलिसांनी अवघ्या काही तासातच मोबाईल नेटवर्क लोकेशनच्या आधारे अटक केली आहे.
डोंबिवली पूर्वेतील माणगाव परिसरात राहणारी १४ वर्षाची मुलगी बुधवारी रात्री राहत असलेल्या घराचा दरवाजा बंद करण्यासाठी गेली होती. हे घर इमारतीमध्ये तळमजल्यावर आहे. त्यामुळे इमारतीच्या तळमजल्याजवळ खाली ही मुलगी आली होती. तेथील समोरच्या इमारतीमध्ये पीओपीचे काम करण्यासाठी आलेल्या दोन तरुणांनी तिचे अपहरण करत तिच्यावर सामूहिक बलात्कार केला. त्यानंतर मुलीला जीवे ठार मारण्याची धमकी देत ज्या घरात काम सुरू होते, त्या घरात जाऊन ते झोपले. ही घटना पीडित मुलीने आपल्या आईला सांगत मानपाडा पोलीस ठाणे गाठले. सकाळी मुलीच्या घराबाहेर गोंधळ पाहून दोघेही पळून गेले. मानपाडा पोलिसांनी या घटनेचे गांभीर्य ओळखून या दोघांचा शोध युद्धपातळीवर सुरु केला. मुब्रा येथे राहणारे हे दोन्ही आरोपी उत्तरप्रदेशातील बरानपूर या मूळ गावी पळून जाण्याच्या तयारीत असतानाच हजामत अली (२०) आणि खुर्शीद आलम (२२) या दोघांना मानपाडा पोलिसांनी मोबाईल फोन लोकेशनच्या आधारे एकास ठाण्यातून तर दुसऱ्याला मुंब्र्याहून अटक केली.