खँती मॅन्सिस्क – कँडिडेट्स बुद्धिबळ स्पर्धेत बुधवारी माजी जगज्जेता विश्वनाथन आनंद आणि रशियाचा सर्जी कार्याकिन यांच्यातील डाव बरोबरीत सुटला. आनंदची ही सलग तिसरी बरोबरी आहे. बरोबरीचे शुक्लकाष्ठ सुटत नसले तरी सहाव्या फेरीअखेर चार गुणांसह त्याने अव्वल स्थान राखले आहे.
अन्य लढतीत बल्गेरियाचा व्हॅसेलिन टोपालोवने रशियाचा व्लादिमिर क्रॅमनिकला हरवले. पाचव्या फेरीत रशियाच्या पीटर स्विडलरविरुद्धच्या लढतीतून बोध घेत टोपालोवने प्रतिस्पध्र्याला वरचढ होण्याची तसेच नशीबवान ठरण्याची संधी दिली नाही.टोपालोवविरुद्ध नशीबाने विजय मिळवलेल्या स्विडलरचे अझरबैजानचा शखरियार मामेद्यारोवविरुद्ध काहीच चालले नाही. अव्वल सीडेड अर्मेनियाचा लेवॉन अरोनियन आणि रशियाचा दिमित्री आंद्रेकीन यांच्यातील लढतही बरोबरीत सुटली. यात अरोनियनने विजयाच्या अनेक संधी दवडल्या. सातव्या फेरीनंतर अरोनियनने (३.५ गुण) दुसरे स्थान मिळवले आहे. क्रॅमनिकसह टोपालोव, स्विडलर आणि मामेद्यारोवच्या खात्यात प्रत्येकी तीन गुण आहेत. कार्याकिन (२.५ गुण) आणि आंद्रेकीन शेवटच्या दोन स्थानांवर आहेत.