नवी दिल्ली – भाजपच्या नवी दिल्लीतील राष्ट्रीय मुख्यालयाबाहेर आप आणि भाजप कार्यकर्त्यांमध्ये झालेल्या हाणामारी प्रकरणी दिल्ली पोलिसांनी प्राथमिक तक्रार दाखल करुन, आपच्या चौदा कार्यकर्त्यांना अटक केली आहे. पत्रकारितेतून राजकरणात प्रवेश करणारे आशुतोष आणि शाझिया इल्मी यांच्या विरोधातही तक्रार दाखल केल्याची माहिती पोलिसांनी दिली.
पार्लमेंट स्ट्रीट पोलिस स्टेशनमध्ये बुधवारी रात्री हा गुन्हा दाखल करण्यात आला. दंगल, सार्वजनिक मालमत्तेचे नुकसान, सरकारी कर्मचा-यांच्या कामकाजात अडथळा आणणे या कलमांखाली गुन्हा नोंदवण्यात आला आहे. पोलिसांनी सुरुवातीला ३३ जणांना ताब्यात घेतले होते त्यातील १४ जणांना अटक करण्यात आली.आपचे प्रमुख नेते अरविंद केजरीवाल यांना बुधवारी गुजरातमध्ये रोड शो करण्यापासून रोखण्यात आले. त्याच्या निषेधार्थ आपचे दिल्लीतील कार्यकर्ते भाजप मुख्यलयाबाहेर प्रदर्शन करत होते. त्यावेळी दोन्ही पक्षांच्या कार्यकर्त्यांमध्ये जोरदार हाणामारी झाली. केजरीवाल यांना रोखण्याचे लखनऊमध्येही हिंसक पडसाद उमटले. तेथेही दोन्ही पक्षांच्या कार्यकर्त्यांमध्ये हाणामारी झाली.या हाणामारीमध्ये एकूण २८ जण जखमी झाले. यात आपचे तेरा आणि भाजपचे दहा कार्यकर्ते असल्याची माहिती पोलिसांनी दिली. अटक केलेल्या आरोपींनी गुरुवारी दुपारी स्थानिक न्यायालयात हजर करण्यात येणार आहे.