नवी दिल्ली, दि. २८ – आम आदमी पक्षाच्या राष्ट्रीय कार्यकारिणीच्या बैठकीला आज युद्धभूमीचे स्वरूप आले होते. प्रशांत भूषण आणि योगेंद्र यादव यांचे भवितव्य ठरवण्यासाठी घेण्यात आलेल्या बैठकीत त्या दोघांचीही कार्यकारिणीतून हकालपट्टी करण्याचा निर्णय घेण्यात आला. मात्र या बैठकीत लोकशाहीची हत्या झाल्याचे सांगत आपल्याला लाथा- बुक्क्यांनी मारहाण करून बाहेर हाकलण्यात आल्याचा आरोप योगेंद्र यादव यांनी केला आहे.
शनिवारी पार पडलेल्या बैठकीची सुरूवातच वादळी झाली. आपचे प्रमुख अरविंद केजरीवाल बैठकीसाठी उपस्थित राहिले खरे, मात्र योगेंद्र यादव आणि पक्षाच्या अनेक कार्यकर्त्यांना बैठकीसाठी आत प्रवेशच दिला गेला नाही. यामुळे नाराज झालेले यादव हे धरणे आंदोलनास बसले, अखेर थोड्या वेळाने त्यांना आत जाण्याची परवानगी देण्यात आली.
त्यानंतर बैठकीत योगेंद्र यादव, प्रशांत भूषण, प्रा. आनंद कुमार आणि अजित झा या चौघांनीही पक्षाच्या सर्व पदावरून हटवण्याचा निर्णय घेण्यात आला.
या बैठकीत आमचे कुठलेही म्हणणे ऐकून घेतले नाही, बाऊन्सर्सनी आम्हाला व कार्यकर्त्यांना मारहाण करत बाहेर काढले, असा आरोप यादव यांनी केला. ही लोकशाहीची हत्या असल्याचेही ते म्हणाले.दिल्लीत प्रचंड बहुमताने सत्तेवर आलेल्या आम आदमी पक्षात नंतरच्या जेमतेम महिनाभरातच गृहयुद्धाचा भडका उडाला आहे.