मुझफ्फरपूर- दोन अज्ञान महिलांनी जनता दल आणि भाजपा आमदारांच्या नुकत्याच जन्मलेल्या नातवाचे रुग्णालयातून अपहरण केल्याने खळबळ उडाली आहे.
मिळालेल्या माहितीनुसार, संयुक्त जनता दलाचे आमदार दिनेश प्रसाद सिंह आणि भाजपाच्या आमदार वीणा देवी यांच्या नातवाचे बिहारमधल्या एका खासगी रुग्णालयातून अपहरण करण्यात आले आहे. वरिष्ठ पोलीस अधिक्षक रणजीत कुमार मिश्रा यांनी घटनास्थळी भेट दिली असून पोलीस कसून तपास करत आहेत.
अभिषेक उर्फ राजा बाबू आणि त्यांची पत्नी खुशी यांना शुक्रवारी मुलगा झाला. त्याला पहाण्यासाठी दोन चांगल्या वेशभूषा असलेल्या महिला पहायला आल्या होत्या. थोडावेळ त्या नवजात बालकाशी खेळत राहिल्या आणि खुशीला झोप लागताच त्यांनी मुल घेऊन तेथून पोबारा केला.याप्रकरणी रुग्णालयातील सीसीटीव्ही फुटेज तपासण्यात येत आहेत. तसेच प्रवेशद्वारावरील खासगी सुरक्षारक्षक अजयकुमार राय आणि कुमार राकेश या दोघांना पोलिसांनी चौकशीसाठी ताब्यात घेतले आहे. तसेच या दोन महिलांचे छायाचित्र संपूर्ण जिल्ह्यात लावणार असल्याचे पोलिसांनी सांगितले.