जोधपूर – अल्पवयीन मुलीचे लैंगिक शोषण केल्याच्या आरोपाखाली अटकेत असलेला स्वयंघोषित अध्यात्मिक गुरु आसाराम बापूचा जामीन अर्ज सोमवारी राजस्थान उच्च न्यायालयाने फेटाळून लावला. बचाव पक्षाचे ज्येष्ठ वकिल राम जेठमालानी यांचा युक्तीवाद न्यायमूर्ती नीरमल जीत कौर यांच्या न्यायालयाने फेटाळून लावला.
जामीन मंजूर व्हावा यासाठी जेठमालानींनी पिडित तरुणीच्या आरोपांवर प्रश्न उपस्थित केले होते. पिडित तरुणी आई-वडिलांसह स्वत: आश्रमात आली होती तसेच आसाराम ब-याच काळापासून तुरुंगात असल्याने ते अशक्त आणि आजारी आहेत हा जेठमालानींचा युक्तीवाद न्यायालयाने फेटाळून लावला. सरकारी वकिल महीपाल बिष्णोई यांनी बचाव पक्षाचे सर्व मुद्दे खोडून काढून जामीनाला विरोध केला होता. युक्तीवाद पूर्ण झाल्यानंतर न्यायालयाने तीन फेब्रुवारीला निर्णय राखून ठेवला होता. अखेर सोमवारी न्यायालयाने जामीन फेटाळून लावला. आसाराम ऑगस्ट महिन्यापासून तुरुंगात आहेत. त्याच्यावर आश्रमात आलेल्या अल्पवयीन मुलीचे लैंगिक शोषण केल्याचा आरोप आहे. आसारामचा मुलगा नारायण साईही बलात्काराच्या आरोपाखील तुरुंगात आहे. त्याच्यावर सूरतमधल्या दोन सख्ख्या बहिणींनी लैंगिक शोषण केल्याचा आरोप केला आहे.