नवी दिल्ली –  भाजपप्रणीत राष्ट्रीय लोकशाही आघाडीचे सरकार गरीबांसाठी, तरुणांसाठी आणि महिलांच्या विकासासाठी कटिबध्द असेल. सत्तेवर येणारे सरकार गरीबांचा आवाज ऐकेल, गरीबांच्या विकासासाठी प्रयत्नशील राहील असे नरेंद्र मोदी यांनी मंगळवारी संसदीय नेतेपदी निवड झाल्यानंतर सेंट्रल हॉलमध्ये बोलताना सांगितले.
आमचे सरकार येथे पदासाठी नव्हे तर, जबाबदारी पूर्ण करण्यासाठी आले आहे. ससंदेमध्ये ज्यांनी आपल्याला पाठवले आहे त्यांच्या इच्छा, अपेक्षा, आकांक्षाची पूर्तता करण्याचे आपले स्वप्न असले पाहिजे असे नरेंद्र मोदी म्हणाले. सेंट्रल हॉलमध्ये भाषण करताना नरेंद्र मोदी काही क्षणासाठी भावुक झाले होते. देश आणि भाजप आपली आई असल्याचे त्यांनी यावेळी सांगितले. याआधीच्या सरकारांनी काही केले नाही असे मी किंवा भाजप कधीही म्हणणार नाही. प्रत्येक सरकार आपल्यापरीने देशाची सेवा करते.मी याआधीच्या सरकारांचे आणि त्यांच्या नेत्यांचे अभिनंदन करतो. आम्ही त्यांचे चांगले काम पुढे नेऊ आणि ते अधिक चांगल्या पध्दतीने करण्याचा प्रयत्न करु असे मोदींनी सांगितले. देश पुढे गेला आहे. आपल्याला पुढे जायचे आहे कि, नाही ते आपल्याला ठरवायचे आहे असे नरेंद्र मोदी म्हणाले.