कैरो – इजिप्तमधील न्यायालयाने सोमवारी मुस्लिम ब्रदरहूडचे प्रमुख मोहम्मद बदी आणि त्याच्या ६८२ समर्थकांना फाशीची शिक्षा सुनावली. न्यायालयाच्या या निर्णयामुळे इजिप्तमधील तणाव आणखी भडकण्याची शक्यता आहे. गेल्यावर्षी मोहम्मद मोर्सी यांना राष्ट्राध्यक्षपदावरुन हटवल्यापासून इजिप्तमध्ये अशांतता आहे.
पोलिसांवर हल्ला करणे, त्यांची हत्या करणे या आरोपांखाली न्यायालयाने त्यांना फाशीची शिक्षा सुनावली. गेल्यावर्षी १४ ऑगस्ट रोजी मोर्सी समर्थकांनी दक्षिण मिन्यामध्ये एक पोलिस ठाण्यावर हल्ला करुन, पोलिसांची हत्या केली होती. फाशीची शिक्षा सुनावलेल्या ६८२ दोषींपैकी ५० पोलिसांच्या ताब्यात आहेत, काही जण जामिनावर बाहेर आहेत तर, काही फरार आहेत.
न्यायालयाबाहेर शिक्षा ऐकण्यासाठी थांबलेल्या दोषींच्या महिला नातेवाईक फाशीची शिक्षा ऐकल्यानंतर तेथेच चक्कर येऊन कोसळल्या. दुस-या एका प्रकरणात याच न्यायालयाने आज ४९२ दोषींना सुनावलेली फाशीची शिक्षा जन्मठेपेमध्ये बदलली. मागच्या महिन्यात न्यायालयाने ५२९ दोषींना फाशीची शिक्षा सुनावली होती.