यवतमाळ  – कळंब येथील एका इसमाचा खून करणाºया आरोपीस  जन्मठेप व ५०० रुपये दंडाची शिक्षा ठोठावली. मुख्य सत्र न्यायाधिश सविता बारणे यांनी आज शुक्रवारी हा निकाल दिला. जावेद खा सुलतान खा (४४) रा. कळंब असे आरोपीचे  नाव आहे.
जावेद खा सुलतान खा हा गावातीलच  सुनिता  विजय  निशानदार या महिलेला काम असेल तेव्हा पैशाची मदत करीत होता. त्यामुळे तीला कुठेही भेटायला बोलावत होता. अशातच २८ डिसेंबर २०१३ रोजी सकाळी ४.३० वाजताच्या सुमारास आरोपी जावेद खा हा सदर महिलेसोबत बोलत होता. हा प्रकार महिलेचा पती विजय यादव निशानदार याच्या निदर्शनास आला. त्यामुळे जावेद ने विजयसोबत वाद करून बेदम मारहाण केली. त्यानंतर त्याला बांधून दुचाकीवरून शिगणापूर रोडवरील एमएसीबी पावर हाऊसजवळील खतीब याच्या शेतातील विहीरीत फेकुन दिले. त्यामुळे पाण्यात बुडून विजयचा मृत्यू झाला. ही बाब आरोपीने मृतकाच्या पत्नीला येऊन सांगितली व याबाबतची माहिती कोणाला सागितल्यास जिवे मारण्याची धमकी दिली. या घटनेची तक्रार सुनिता निशानदार या महिलीने कळंब पोलिस ठाण्यात दिली. त्यावरून आरोपी जावेद खा विरूद्घ भादंवि कलम ३०२, ५०६, २०१ अंतर्गत गुन्हा दाखल केला. ठाणेदार बाळु गायगोले यानी आरोपीला अटक करून प्रकरण न्यायप्रविष्ठ केले. मुख्य सत्र न्यायाधिश सविता बारणे यांच्या न्यायालयात या प्रकरणाची सुनावणी पार पडली. यामध्ये सरकारी पक्षाच्या वतीने सात साक्षीदार तपासण्यात आले. त्यापैकी फिर्यादीची साक्ष महत्वपूर्ण ठरली असून दोषी आढळून आल्याने आरोपी जावेद खा याला जन्मठेप व ५०० रुपये दंडाची शिक्षा ठोठावली. सरकारी पक्षातर्फे सहाय्यक सरकारी वकील निती दवे यांनी काम पाहीले.