बुलडाणा- बुलडाणा जिल्हयातील सावणा येथे सासू, पत्नी आणि आठ वर्षांच्या मुलीचा निर्घृण खून करुन संतोष भाडाईत हा नराधम फरार झाला आहे. चिखली तालुक्यातील सावणा येथे ही दुर्दैवी घटना घडल्याचे मंगळवारी उघडकीस आले. विमल बळीराम गाढवे, गीता संतोष भाडाईत आणि आरती संतोष भाडाईत अशी मरण पावलेल्या तिघांची नावे आहेत.
मिळालेल्या माहितीनुसार, विमल गाढवे यांची मुलगी गीता हीचा १० वर्षांपुर्वी तालुक्यातील इसोली येथील संतोष भाडाईत याच्याशी विवाह झाला होता. मात्र गेल्या काही वर्षांपासून गीता आणि संतोष हे गीताच्या आईकडेच राहत होते. संतोष आणि गीताला आठ वर्षांची आरती नावाची मुलगी होती.
सोमवारी रात्रीच्या वेळी घरातील सर्वजण झोपलेले असताना संतोष याने या तिघांची निर्घृण हत्या केली व तो पसार झाला. विमल आणि त्यांची मुलगी बाहेर येत नसल्यामुळे मंगळवारी सकाळी शेजारी त्यांना बघायला गेले असता सदर प्रकार उघडकीस आला.
याबाबत गावच्या पोलीस पाटलाने माहिती देताच पोलीस अधिकारी श्वान पथकासह घटनास्थळी दाखल झाले असून अधिक तपास सुरु आहे.