मुंबई – ‘ऑटीस्टीक’ विद्यार्थ्यांना करावी लागणारी आकडेमोड सोपी व्हावी, यासाठी १२वीच्या परीक्षेतील गणित विषयासह भौतिकशास्त्र, रसायनशास्त्र, बुक कीपिंग, अकाऊंटण्सी या विषयांसाठी साधा (बेसिक) कॅलक्युलेटर वापरण्याची परवानगी देण्याचा महत्त्वपूर्ण निर्णय शिक्षण मंडळाने घेतला आहे. शालेय शिक्षणमंत्री विनोद तावडे यांनी ही माहिती दिली. ही सुविधा ११वीच्या विद्यार्थ्यांनाही मिळणार आहे.
लर्निंग डीसॲबिलीटीज आणि ऑटीस्टीक असणाऱ्या ११वी आणि १२वीच्या विद्यार्थ्यांना बेसिक कॅलक्युलेटर वापरता येणार आहे. तो विद्यार्थ्यांना स्वत:च आणावा लागेल. मोबाईलमधील कॅलक्युलेटर किंवा तत्सम कॅलक्युलेटर वापरता येणार नाही, असेही तावडे यांनी स्पष्ट केले.
लोकप्रतिनिधी, शासकीय अधिकारी, पालक संघटना, शिक्षक आणि शिक्षणतज्ज्ञांनी ऑटीस्टीक विद्यार्थ्यांना गणितीय संकल्पनांसाठी अशा प्रकारचा कॅलक्युलेटर परीक्षेच्या काळात वापरण्यास परवानगी देण्याची मागणी अनेकदा केली होती. त्याची दखल घेत शालेय शिक्षणमंत्री तावडे यांनी हा निर्णय घेतला. ११वी आणि १२वीच्या विद्यार्थ्यांना ही सुविधा देण्याची सूचना परीक्षा केंद्र संचालकांना देण्यात आल्या आहेत; तसेच या परिपत्रकाच्या सूचना परीक्षा केंद्रांवर प्रसिध्द करण्याचे निर्देशही देण्यात आले आहेत.