ढाका- इस्लामी कट्टरपंथीयांविरोधात ‘मुक्तो-मनो’ (मुक्त मन) या आपल्या ब्लॉगच्या माध्यमातून ‘आवाज’ उठवणारे अमेरिकन ब्लॉगर अविजीत रॉय यांची ढाक्यात चॉपरचे घाव घालून हत्या करण्यात आली. भररस्त्यात झालेल्या या हल्ल्यात रॉय यांच्या पत्नी रफिदा अहमद बन्ना याही गंभीर जखमी झाल्या आहेत. या हल्ल्यात त्यांच्या हाताचे बोटही छाटले गेले आहे.
ढाका विद्यापीठाच्या आवारातील ‘बांगला अकादमी बुक फेअर’ला भेट देऊन परतणा-या रॉय दाम्पत्याला घेरून गुरुवारी रात्री १० ते १२ जणांच्या सशस्त्र टोळक्याने त्यांच्यावर सपासप वार केले. रक्ताच्या थारोळ्यातील या दोघांना हल्लेखोरांनी फरफटत पदपथावर फेकले. रॉय यांच्या डोक्याची जखम खोलवर असल्याने त्यांचा जागीच मृत्यू झाला तर पत्नी बन्ना या बचावल्या असून त्यांना रुग्णालयात दाखल करण्यात आले आहे.
‘बांगला अकादमी बुक फेअर’ला उपस्थित राहण्यासाठी रॉय दाम्पत्य काही दिवसांपूर्वीच ढाक्यात आले होते. आपल्या लिखाणातून सातत्याने इस्लाममधील कट्टरवाद्यांवर टीका करणा-या रॉय यांना अनेकदा जीवे मारण्याच्या धमक्या आल्या होत्या. त्यामुळे अशाच शक्तींनी त्यांची हत्या केली असावी, अशी शक्यता असून पोलीस त्या दिशेनेच तपास करत आहेत. अद्याप कुणालाही अटक करण्यात आलेली नाही.
रॉय यांचा जन्म बांगलादेशातील होता. त्यांनी नंतर अमेरिकी नागरिकत्व स्वीकारले होते. ‘मुक्तो मोनो’ हा त्यांचा ब्लॉग कट्टरतेविरोधातील लिखाणाने चर्चेत होता. त्यांचे लिखाण आणि विश्वासर व्हायरस (व्हायरस ऑफ फेथ) आणि सुन्यो थेके महाविश्वा (फ्रॉम व्हॅक्युम टु दि युनिव्हर्स) ही दोन पुस्तके झोंबल्यामुळे त्यांना सातत्याने धमक्या येत होत्या. बांगलादेशात आल्यास रॉय जिवंत जाणार नाहीत, अशा स्वरूपाच्या धमक्या दिल्या जात होत्या, असे रॉय कुटुंबीयांकडून सांगण्यात आले. दरम्यान, या घटनेनंतर रॉय यांचा ब्लॉग तात्पुरता बंद करण्यात आला असून ‘आज आम्ही शोकाकुल असलो तरी आम्हाला कुणीही संपवू शकणार नाही’ असा बांगला भाषेतील संदेश या ब्लॉगपेजवर सध्या दिसत आहे.