वाहतूक पोलिसांच्या सतर्कतेने जीवित हानी टळली
यवतमाळ  , दि. २२  – जांब मार्गाकडून आर्णी बायपासकडे येणाºया कारने विद्युत खांबाला धडक दिल्याने जिवंत विद्युत तारा तुटून पडल्या. आज गुरुवारी रात्री ७ वाजता ही घटना घडली. यामध्ये चालक जखमी झाला असून वाहतूक पोलिसांच्या सतर्कतेने मोठी जीवित हानी टळली.
इंद्रनिवास शंकर गोरे (३५) रा. वडगाव रोड असे जखमीचे नाव आहे. भोकरे नामक व्यक्तीच्या कारने (एम.एच. २९ / ए.डी. ३९९९) चालक गोरे व अन्य दोन व्यक्ती जांब मार्गाकडून आर्णी बायपासने येत होते. अशातच रस्त्यावरील वीज खांबाला कारने धडक दिली. ही धडक एवढी जबरदस्त होती की, यामध्ये खांब पूर्णपणे वाकला असून, ३३ केव्ही विद्युत पुरवठा करणाºया जिवंत तारा तुटून रस्त्यावर लोंबकळत होत्या. या बाबतची माहिती जिल्हा वाहतूक शाखेचे पोलीस नायक  सुरेंद्र वासनिक यांना मिळाली. त्यांनी लगेच  घटनास्थळ गाठून वीज वितरणच्या मुख्य कार्यालयात दूरध्वनीवरून माहिती देऊन विद्युत पुरवठा खंडित करायला लावला. त्यामुळे कुठलीही जीवित हानी झाली नाही. या घटनेची माहिती मिळताच वडगाव रोडचे सहा. पोलीस निरीक्षक गोमासे हे आपल्या पथकासह दाखल झाले होते. यामुळे वडगाव, जांब रोड, पृथ्वीराजनगर, बेले ले-आऊट, रामकृष्णनगर, दांडेकर ले-आऊट, गुरुकृपा नगरी, मुलकी यासह परिसरातील विद्युत पुरवठा खंडित झाला होता. रात्री उशिरापर्यंत विद्युत पुरवठा सुरळीत करण्याचे काम सुरू होते. यावेळी पांढरकवडा, आर्णी या मार्गावरील वाहतूकही दोन ते तीन तास खोळंबली होती. जखमी चालक गोरे याच्यावर येथील शासकीय रुग्णालयात उपचार सुरू आहे.