नवी दिल्ली – केंद्रीय मंत्री नितीन गडकरी यांनी दिल्लीचे माजी मुख्यमंत्री अरविंद केजरीवाल यांच्याविरोधात केलेल्या फौजदारी अब्रुनुकसानीच्या प्रकरणात कोर्टाच्या आदेशाचे पालन न केल्याबद्दल दिल्लीतील स्थानिक कोर्टाने गडकरी यांना १० हजार रुपयांचा दंड ठोठावला आहे.
या प्रकरणाची सुनावणी शनिवारी होती. या सुनावणीच्या तीन दिवस आधी याबाबतचे प्रतिज्ञापत्र सादर करण्याचे आदेश मेट्रोपोलिटन मॅजिस्ट्रेट कोर्टाने गडकरींना दिले होते. हे प्रतिज्ञापत्र केजरीवाल यांच्या वकिलाकडे तीन दिवस आधी पोहोचणे अपेक्षित होते, मात्र ते शनिवारीच मिळाले, असे सांगत कोर्टाने गडकरींना १० हजार रुपयांच्या दंडाच्या बदल्यात अखेरची संधी दिली आणि या प्रकरणाची पुढील सुनावणी २१ मार्च २०१५ रोजी ठेवली.
‘आप’च्या केजरीवाल यांनी देशातील सर्वाधिक भ्रष्ट व्यक्तींच्या यादीत आपले नाव समाविष्ट करून आपली प्रतिमा मलीन केली आहे, असे सांगत गडकरी यांनी केजरीवाल यांच्याविरोधात अब्रूनुकसानीचा दावा केला होता.