नवी दिल्ली – भाजपाकडून दिल्लीच्या मुख्यमंत्रीपदाच्या उमेदवार म्हणून किरण बेदी यांचे नाव जाहीर होताच दिल्लीमध्ये भाजपा आणि आपमध्ये वाकयुध्दाला सुरुवात झाली आहे.
मंगळवारी सकाळी किरण बेदी यांचे मुख्य स्पर्धक अरविंद केजरीवाल यांनी टि्वटरवरुन बेदींना मुख्यमंत्रीपदाच्या उमेदवारीबद्दल शुभेच्छा दिल्या आणि लगेचच खुल्या चर्चेचे आव्हान दिले. मी किरण बेदींना खुल्या चर्चेचे आव्हान देतो. लोक धर्म-जात या आधारावर मतदान करतात. त्यांना मुद्यांची कल्पना नसते. जनतेच्या महत्वाच्या प्रश्नांवर एक ते दोन तास वादविवाद झाला पाहिजे. यानिमित्ताने लोकशाहीमध्ये चांगला पायंडा पडेल असे केजरीवाल म्हणाले.
केजरीवालांनी बेदींना टि्वटरवरील त्यांचे बंद केलेले खाते सुरु करण्याची विनंती केली. बेदींनी आपल्या टि्वटर अकाऊंटवरील केजरीवालांचे खाते ब्लॉक केले आहे. केजरीवालांचे टि्वटर अकाऊंट वातावरण दूषित करते. त्यांच्या संदेशातून नकारात्मकता निर्माण होते. त्यामुळे पंधरा महिन्यांपूर्वी मी माझ्या टि्वटर अकाऊंटवरील केजरीवालांचे खाते बंद केले असे बेदी म्हणाल्या.
बेदी यांनी केजरीवालांचे खुल्या चर्चेचे आव्हान स्विकारले असले तरी, ही चर्चा विधानसभेत होऊं द्या असे सांगत त्यांनी अप्रत्यक्षपणे निवडणूक काळातील खुल्या चर्चेचे आव्हान फेटाळून लावले.
दिल्ली विधानसभा निवडणुकीतील काँग्रेसचे प्रचार समितीचे प्रमुख अजय माकन यांनी केजरीवालांचे खुल्या चर्चेचे आव्हान स्विकारण्याची तयारी दाखवली. या निमित्ताने एक चांगाल पायंडा पडेल. परस्पर सहमतीने एखाद्या वृत्तवाहिनीची निवड करुन, त्यावर वादविवाद झाला पाहिजे. जेणेकरुन जनतेसमोर आपल्या योजना, विचार मांडता येतील असे माकन म्हणाले.