नवी दिल्ली – एनडीएचे पंतप्रधानपदाचे उमेदवार नरेंद्र मोदी यांना वाराणसीत कोणत्याही परिस्थितीत पराभूत करण्याचा चंग आम आदमी पक्षाचे नेते अरविंद केजरीवाल यांनी बांधला आहे. त्यासाठी केजरीवालांनी ‘वाराणसीचा डॉन’ म्हणून ओळखले जाणारे मुख्तार अन्सारी यांच्याशी हातमिळवणीचे संकेत दिले आहेत. मोदी आणि गांधींना हरवण्यासाठी जो कोणी आम्हाला पाठिंबा देईल, त्याला सोबत घेऊ,’ असं  केजरीवालांनी म्हटलं आहे.
उत्तर प्रदेशातील वाराणसी लोकसभा मतदारसंघात केजरीवालांनी मोदींना आव्हान दिले आहे. मोदींच्या हिंदुत्ववादी प्रतिमेमुळे केजरीवालांची खरी भिस्त मुस्लिम मतांवर आहे. वाराणसीतील मुस्लिम धर्मगुरूंनीही शाही इमामांचे आवाहन धुडकावून केजरींना पाठिंबा दिला आहे. त्यातच गेल्या वेळी येथून निवडणूक लढणारे मुख्तार अन्सारी यांनी निवडणुकीतून माघार घेतल्याने केजरींच्या आशा पल्लवित झाल्या आहेत. आता केजरीवालांनी अन्सारी यांच्या कौमी एकता दलाचा थेट पाठिंबा मिळविण्याचे प्रयत्न चालवले आहेत. सूत्रांनी दिलेल्या माहितीनुसार, मुख्तार अन्सारी यांचे बंधू व कौमी एकता दलाचे अध्यक्ष अफझल अन्सारी आणि केजरीवाल यांच्यात यासंदर्भात चर्चेच्या अनेक फेऱ्या झाल्या आहेत. मुख्तार ‘आप’ला पाठिंबा देण्याची शक्यता वर्तवली जात आहे. केजरीवाल यांच्या पक्षाचा वाराणसीत कोणताही प्रभाव नाही. त्यांची स्वतंत्र अशी व्होटबँक नाही. मात्र, अन्सारी यांचा पाठिंबा मिळाल्यास चार लाख मुस्लिम मतांच्या बळावर मोदींशी थेट लढत देता येईल, असा विश्वास त्यांना आहे. हेच गणित लक्षात घेऊन त्यांनी कोणाचाही पाठिंबा चालेल, असा प्रचार सुरू केला असल्याचे मानले जात आहे.