कोल्हापूर- शहरातील टोल विरोधी आंदोलनाने बुधवारी पुन्हा एकदा पेट घेतला. शिरोली येथील टोलनाक्यावर टोलवसुली सुरु झाल्याने सर्वपक्षीय नगरसेवकांनी ठिय्या आंदोलन सुरु केले. त्यातच नगरसेवक आणि पोलिस यांच्यात बाचाबाची झाली. यावेळी पोलिस आणि नगरसेवक यांच्यात धक्काबुक्की झाली. त्यात महापौर सुनीता राऊत या किरकोळ जखमी झाल्या आहेत. पोलिसांनी आंदोलन करणा-या सर्व नगरसेवकांना अटक केली असून त्यानंतर पुन्हा टोलवसुली सुरु झाली आहे.
याआधी टोलविरोधात १२ जानेवारी रोजी झालेल्या हिंसक आंदोलनात कोल्हापूरमधील नागरिकांनी टोल नाके पेटवून दिले होते. दरम्यान सर्वपक्षीय नगरसेवकांनी आयआरबी आणि पोलिसांच्याविरोधात कोल्हापूर बंदची हाक दिली आहे.
कोल्हापूर शहरात खासगीकरणाच्या माध्यमातून ५२ किलोमीटरचे रस्ते आयडियल रोड बिल्डर (आयआरबी) कंपनीने बांधले आहेत. यासाठी २२० कोटी रुपये खर्च आला. हा खर्च ३० वर्षे टोल लावून वसूल केला जाणार होता. या विरोधात कोल्हापूरच्या नागरिकांनी सातत्याने जोरदार आंदोलन सुरु केले आहे.