नवी दिल्ली – फिलिप ह्युजच्या मृत्यूनंतर जेमतेम दोन दिवसांनीच क्रिकेट मॅच सुरू असताना बॉल लागल्यामुळे गंभीर इजा होऊन मृत्यू होण्याची आणखी एक घटना घडली. यावेळी ही घटना इस्रायलमध्ये अॅसडोड शहरात घडली.
इस्रायलच्या क्रिकेट टीमचा माजी कॅप्टन एका स्थानिक स्पर्धेत अंपायर (पंच) म्हणून बॉलरच्या दिशेला उभा होता. मॅच सुरू असताना फिल्डरने प्रतिस्पर्धी टीमच्या खेळाडूला रनआऊट करण्याच्या उद्देशाने स्टम्पच्या दिशेने फेकलेला बॉल एका स्टम्पला आपटून थेट अंपायर हिलेल ऑस्कर (५५) यांना लागला. बॉल इतक्या जोरात लागला की, अंपायर ऑस्कर मैदानातच कोसळले, थोड्याच वेळात त्यांचा मृत्यू झाला. मृत्यूचे कारण ब्रेन हॅमरेज की मॅसिव्ह हार्टअॅटॅक (ह्रदयविकाराचा तीव्र धक्का) हे वैद्यकीय अहवाल आल्यानंतर कळेल. याआधी पाच वर्षापूर्वी इंग्लंडमध्ये वेल्स येथे एका मॅचदरम्यान फिल्डरने फेकलेला बॉल चुकून अंपायरलाच लागला आणि त्यांचा मृत्यू झाला होता.
मागच्या आठवड्यात ऑस्ट्रेलियात एका महत्त्वाच्या स्थानिक स्पर्धेत फलंदाजी करताना बॉल लागल्यामुळे फिलिप ह्युज हा २५ वर्षाचा गुणी फलंदाज मैदानातच कोसळला आणि कोमात गेला होता. कोमात गेलेल्या ह्युजचा दोन दिवसांनी मृत्यू झाला, शेवटपर्यंत तो कोमातून किंचितही बाहेर पडू शकला नव्हता. ह्युजच्या अकाली मृत्यू आधी १९९८ मध्ये एका मॅच दरम्यान हेल्मेट न घालता फॉरवर्ड शॉर्ट लेगला फिल्डिंग करत असलेल्या रमण लांबाचा डोक्याला बॉल लागल्यामुळे मृत्यू झाला होता.