आर्णी – घरातील भुयाराचे जागेत खोदकाम करुन गुप्तधन काढल्याचे अफवेने खंडाळा येथे चांगलीच खळबळ उडाली आहे. याप्रकरणी पोलिसांनी नऊ जणांना ताब्यात घेऊन प्रतिबंधात्मक कारवाई केली. खंडाळा येथे रात्री ९ वाजताच्या दरम्यान एका पोलीस पाटाच्या घराच्या आवारात खोदकाम सुरू आहे. यामध्ये त्यांना मोठ्या प्रमाणात गुप्तधन सापडल्याची माहीती गावातील नागरिकांनी पोलिसांना दिली. त्यावरुन डीबी पथकाने घटनास्थळ गाठुन भुयारा जवळ सात ते आठ फुट खोल खोदकाम करुन असल्याचे दिसले. तसेच पुजापातीचे सामान व सात ते आठ जण यावेळी पोलिसांना आढळले. त्यांनी या सर्वांना ताब्यात घेऊन ठाण्यात आणले. रात्री व सकाळी त्यांची कसून चौकशी करून ठाणेदारांनी घटनास्थळाची पाहणी केली. मात्र पोलिसांच्या हाती काहीच लागले नाही. या प्रकरणी पोलिसांनी आठ जणाविरुद्घ प्रतिबंधात्मक कारवाई केली. सध्या खंडाळा गावात ग्रामपंचायत निवडणूक असल्याने विरोधकांनी अफवा परसवून पोलीसांना माहिती दिल्याचे त्या पाटलाचे म्हणने आहे. डीबी पथकाने गुप्तधन प्रकरणातही पाटलावर दबाव टाकुन मोठी डील केल्याची चर्चा आहे.