नाशिकरोड – खरे सोने दाखवून नंतर बनावट सोने गळ्यात मारणाऱ्या महिलेसह तीन जणांना गुन्हे शाखा क्रमांक तीनच्या पथकाने नारायणबापू चौकाजवळ शुक्रवारी अटक केली. त्यांच्याकडून साडेआठ हजाराचा ऐवज जप्त केला.
जेलरोड-सायखेडा रोडवरील नारायणबापू चौकातील अभिनव शाळेजवळ गणेश गंगाराम प्रजापती (४२, व्यापारी, रा. अबलापूर रेल्वे स्टेशनजवळ लखनऊ), बालचंद धनीराम गुजराती (वय २५) आणि राधा राजू राय (३५, मजुरी, दोघे रा. मैहेबुलापूर, लखनऊ) हे निम्म्या दरात सोने विकत असल्याचे पोलिस निरीक्षक सानप यांना समजले. हे तिघे व्यवहारावेळी खऱ्या सोन्याचे दागिने दाखवून नंतर तसेच दिसणारे पितळाचे दागिने गळ्यात मारत होते. गणपतीच्या मुखवट्याचे दागिने व पितळी नाणी ते पंधरा हजार रुपये तोळा या दराने ग्राहकांना विकायचे. सोने निम्म्या दरात मिळत असल्याच्या लालचेने ग्राहक जाळ्यात अडकायचे. पोलिसांनी पंचक येथील संतोष रामनाथ नागरे यांना बनावट ग्राहक करून दोन पंचासमेवत त्यांना अभिनव शाळेजवळ पाठवले. पोलिस निरीक्षक सानप व त्यांचे सहकारी इंदिरा गांधी पुतळ्याजवळ दबा धरून बसले. नजीकच असलेल्या युनियन बँकेच्या एटीएमजवळ प्रजापती व त्यांच्या साथीदारांशी रामनाथ नागरे यांची गाठ पडली. बनावट सोने विकत असतानाच पोलिसांनी त्यांना अटक केली. त्यांच्याकडून साडेतीन किलो गणपतीच्या मुखवट्याचे पितळी दागिने, साडेतीन किलो पितळी नाणी, खऱ्या सोन्याचे १. ४०० ग्रॅमचे चार हजाराचे दागिने, पावणेतीन हजाराची रोकड, मोबाइल जप्त केले. पोलिस निरीक्षक संजय सानप, सहाय्यक निरीक्षक जी. डी. देवडे, सहाय्यक उपनिरीक्षक सुभाष गुंजाळ, विलास गांगुर्डे, गंगाधर केदार, शंकर गडदे, ललिता आहेर, राजेंद्र जाधव आदींनी ही कारवाई केली.