मुंबई, दि. 9 – महाराष्ट्र प्रदेश काँग्रेस कमिटीचे नवनियुक्त अध्यक्ष खा. अशोक चव्हाण यांनी सोमवार, दि. 9 मार्च 2015 रोजी पदाची औपचारिक सूत्रे स्वीकारली. अखिल भारतीय काँग्रेस कमिटीने दि. 2 मार्च 2015 रोजी काँग्रेस प्रदेशाध्यक्ष म्हणून त्यांच्या नावाची घोषणा केली होती.
येथील दादरस्थित प्रदेश कार्यालय टिळक भवन येथे मावळते प्रदेशाध्यक्ष आ.माणिकराव ठाकरे यांनी नवनियुक्त अध्यक्षांना कार्यभार सोपवला. याप्रसंगी अखिल भारतीय काँग्रेस कमिटीचे चिटणीस व महाराष्ट्राचे सहप्रभारी श्री श्योराज जीवन वाल्मिकी यांच्यासह अनेक प्रदेश पदाधिकारी, जिल्हाध्यक्ष व असंख्य कार्यकर्ते उपस्थित होते. कार्यभार स्वीकारल्यानंतर नवनियुक्त अध्यक्षांनी उपस्थितांच्या शुभेच्छांचा स्वीकार केला. तत्पूर्वी खा. अशोक चव्हाण यांनी सिद्धीविनायक मंदीरात दर्शन घेतले. त्यानंतर त्यांनी चैत्यभूमीवर जाऊन भारतरत्न डॉ. बाबासाहेब आंबेडकरांना अभिवादन व शिवाजी पार्क येथील छत्रपती शिवाजी महाराजांच्या पुतळ्याला हारार्पण केले.