नागपूर- खैरलांजी हत्याकांडांवर आधारित ‘खैरलांजीच्या माथ्यावर’ या चित्रपटाच्या प्रदर्शनाला नागपूरच्या खंडपीठाने गुरुवारी तात्पुरती स्थगिती दिली. हा चित्रपट शुक्रवारी सात डिसेंबरला प्रदर्शित होणार होता.
अखिल भारतीय धम्म सेनेचे रवी शेंडे आणि भय्यालाल भोतमांगे यांनी दाखल केलेल्या या तातडीच्या याचिकेवर न्यायालयाने हा आदेश दिला. याचिकेवर १२ फेब्रुवारीला सुनावणी होणार आहे. २९ सप्टेंबर २००६ मध्ये सामाजिक प्रतिष्ठेला काळिमा फासणारी घटना घडली होती. भंडारा जिल्ह्यातील मोहाडी तालुक्‍यातील खैरलांजी गावात क्रूरतेचा कळस गाठत निर्दयी माणसांनी भोतमांगे कुटुंबीयांतील चार जणांचा बळी घेतला होता.  याच घटनांवर आधारित ‘खैरलांजीच्या माथ्यावर’ हा चित्रपट निर्मित करण्यात आला होता. ‘खैरलांजीच्या माथ्यावर’ या चित्रपटात वास्तव घटनांचे चित्रीकरण करण्यात आले असल्याचे निर्मात्यांचे म्हणणे होते. मात्र चित्रपटात असे कोणतेही चित्रण केले नसल्याचे दाखल केलेल्या याचिकेत म्हटले आहे. या चित्रपटाच्या चित्रीकरणाआधी भय्यालाल भोतमांगे यांची परवानगी घेण्यात आलेली नाही, असे याचिकेत नमूद केलेले आहे. तसेच मृत प्रियंका भोतमांगे हिच्या पात्राबाबतही आक्षेपार्ह वर्णन केले आहे असे या याचिकेत स्पष्ट करण्यात आले आहे. याचिकाकर्त्याचे वकील जयदेव श्‍यामकुवर, अ‍ॅड. भूपेश चव्हाण, अ‍ॅड. मिलिंद खोब्रागडे यांनी बाजू मांडली.