सूरत/भरूच- गुजरातमध्ये मकर संक्रांतीच्या सणानिमित्त पतंग उडवताना झालेल्या वादाचे पर्यावसन दंगलीत झाले. या दंगलीत तीन जणांचा मृत्यू झाला. तर अन्य ३० जण जखमी झाले आहेत. यात पोलिस अधिक्षकांसह दोन पोलीसही जखमी झाले आहेत. यामुळे येथील वातावरण तणावग्रस्त असून संपूर्ण हांसोट तालुक्यात जमावबंदी आदेश लागू करण्यात आला आहे.
भरुच जिल्ह्यातील हांसोट तालुक्यातील अंभेठा गावात दोन समुदायांमध्ये पतंग उडवण्यावरुन बुधवारी वाद झाला. मकर संक्रांतीच्या सणानिमित्त काहीजण पतंग उडवत असताना यातील पतंग पकडण्यावरुन एका मुलाने अल्पसंख्यांक समाजातील मुलाला मारहाण केली. त्याचा राग मनात ठेऊन पुन्हा हल्ला केल्याने हा वाद पेटला. हा संघर्ष संपूर्ण तालुक्यात पसरला असून येथील धार्मिक स्थळे आणि दुकानांवर हल्ला करणा-या समुदायाला पांगवण्यासाठी पोलिसांनी सुरुवातीला हवेत गोळीबार केला. मात्र कोणीही जुमानत नसल्याने अखेर अश्रूधुराच्या नळकांड्या फोडल्या.
या संघर्षात जखमी झालेल्या ३० जणांना उपचारासाठी हांसोट, भरुच आणि सुरत येथील रुग्णालयात दाखल केले आहे. तसेच परिस्थिती नियंत्रणात ठेवण्यासाठी राज्य राखीव पोलिस दलाच्या सशस्त्र जवानांना हांसोट येथे तैनात केले आहे.
या भागात लोकांनी दगडफेक केली. तर काही ठिकाणी दुकाने जाळण्यात आल्याचीही माहिती आम्हाला मिळाली आहे. परिस्थिती नियंत्रणात ठेवण्यासाठी वाढीव सुरक्षा मागवण्यात आली असून आता परिस्थिती नियंत्रणात असल्याचे भरुचचे पोलीस अधिक्षक बिपिन अहिरे यांनी सांगितले.