औरंगाबाद – ‘माजी केंद्रीयमंत्री कै. गोपीनाथ मुंडे यांच्या सामाजिक, राजकीय कार्यकर्तृत्वाची ओळख जपणारे सुसज्ज असे स्मारक येथील जालना रोडवरील शासकीय दूध डेअरी जमिनीवर लवकरच उभारले जाईल,’ अशी घोषणा महसूलमंत्री एकनाथ खडसे यांनी पत्रकार परिषदेत केली.
सुभेदारी शासकीय विश्रामगृह येथे आयोजित पत्रकार परिषदेत श्री. खडसे बोलत होते. ‘मराठवाड्याच्या विकासासाठी कायम अग्रणी भूमिका घेणारे मराठवाड्याचे सुपूत्र गोपीनाथ मुंडे यांची सामान्य माणसाबद्दलची निष्ठा आणि विकास कामाबद्दलचा आग्रह या भूमिकेतून त्यांनी केलेली राजकीय वाटचाल ही प्रेरक आहे. त्यांच्या वाटचालीतील महत्त्वपूर्ण प्रसंगांची माहिती करून देणारे दृकश्राव्य चित्रण, त्यांची निवडक भाषणे, त्यांच्या जीवनाबद्दल माहिती देणाऱ्या वस्तूंचे संग्रहालय त्यासोबत ग्रंथालय आणि सुंदर बाग अशा सुविधांनी युक्त उत्कृष्ट असे स्मारक येत्या वर्षभरात उभे करण्याचा शासनाचा विचार आहे,’ असे खडसे म्हणाले.
‘लवकरच मंत्रीमंडळाची मान्यता घेऊन स्थानिक आमदार, तज्ज्ञ व्यक्ती, समाजसेवक यांचा समावेश असणारी जिल्हाधिकारी नियंत्रित स्मारक समिती गठीत केली जाईल. या समितीच्या माध्यमातून स्मारक उभारणीचे काम लवकरच पूर्ण करण्यात येईल,’ असेही खडसे यांनी सांगितले .