नवी दिल्ली – भारत विरोधी कारवायांमध्ये नेहमी पाकिस्तानला मदत करणारा चीन पाकिस्तानचे नियंत्रण असलेल्या काश्मीरमध्ये पाकिस्तानी सैन्याला शस्त्रास्त्र चालवण्याचे प्रशिक्षण देत असल्याची माहिती समोर आली आहे.
सीमा सुरक्षा दलाला मिळालेल्या माहितीनुसार चीनी सैन्य पाकिस्तानचे नियंत्रण असलेल्या काश्मीरमध्ये पाकिस्तानी लष्कराला शस्त्रास्त्र हाताळण्याचे प्रशिक्षण देत आहे. ही नेमकी कुठली शस्त्रास्त्रे आहेत ते सीमा सुरक्षा दलाने स्पष्ट केलेले नाही.
सीमेवर पाकिस्तानने काही महत्वाचे बदल केल्याचेही निदर्शनास आले आहे. पाकिस्तानी लष्कराच्या विशेष पथकांनी पाकिस्तानी रेंजर्सकडून काही चौक्यांचा ताबा घेतला आहे. आबोहार आणि गुरदासपूर सेक्टरमध्ये पाकिस्तानने नव्या टेहळणी चौक्या उभारल्या आहेत. बीएसएफच्या गुप्तचर अहवालानुसार, सीमेवर पाकिस्तानचे जे दूरध्वनी इंटरसेप्ट केले आहेत त्यातील संभाषणावरुन भारतीय जवान आणि मालमत्तेचे जास्तीत जास्त नुकसान करण्यासाठी मोक्याच्या जागांवर अचूक नेमबाज तैनात करण्याची पाकिस्तानची योजना आहे. पाकिस्तानचे नियंत्रण असलेल्या काश्मीरमध्ये चीनी सैन्याच्या उपस्थितीचा मुद्दा भारताने अनेकदा चीनकडे व्दिपक्षीय चर्चे दरम्यान उपस्थित केला आहे. पण चीनने प्रत्येकवेळी पाकिस्तानातील पायाभूत प्रकल्पांमध्ये काम करणारे ते बांधकाम मजूर असल्याचा दावा केला.