नागपूर : नागपूरमध्ये अजनी येथील लोहमार्ग मुख्यालयात चुकून गोळी लागल्याने हेडकॉन्सटेबल राजेश बांगडीकर (वय ५० वर्ष) यांचा मृत्यू झाला. तर शस्त्रात्र विभागातील एकनाथ लिहीतकर हे जखमी झाले आहेत. हा अपघात झाल्याने काही वेळ मुख्यालयात गोंधळाची परिस्थिती निर्माण झाली होती.
लोहमार्ग मुख्यालयात कार्यरत असणारे राजेश बांगडीकर हे आज (बुधवार) नक्षलवादी भागातून गस्त घालून दुपारी बाराच्या दरम्यान मुख्यालयात बंदूक जमा करण्यासाठी आले होते. त्याचवेळी शस्त्रात्र निरिक्षक एकनाथ लिहीतकर यांना बंदूक रिकामी आहे असे वाटल्याने बंदूक हातावर घेतली. मात्र त्याचवेळी बंदुकीतून चुकून गोळी झाडली गेली. गोळी एकनाथ लिहीतकरांच्या हातातून आरपार जात राजेश यांच्या पोटात लागली. जवानांना तात्काळ जवळच्या ऑरेंज सिटी रुग्णालयात दाखल करण्यात आले. मात्र राजेश बांगडीकर यांना डॉक्टरांनी मृत घोषित केले. पुढील तपासणीसाठी त्यांचा मृतदेह शवविच्छेदनासाठी पाठविण्यात आला आहे. याप्रकरणी अधिक चौकशी सुरु आहे.