जम्मू- कथुआ जिल्ह्यातील पोलीस ठाण्यावरील दहशतवादी हल्ल्यानंतर शनिवारी सकाळी संशयित दहशतवाद्यांनी सांबा जिल्ह्यातील लष्करी तळाजवळ जोरदार गोळीबार केला. यामध्ये एकजण जखमी झाला आहे.
सकाळी पाच वाजून ५० मिनिटांच्या सुमारास दहशतवाद्यांनी सांबामधील लष्करी तळाजवळील गोळीबार केला. यामध्ये एक नागरिक जखमी झाला. पपू यादव असे या नागरिकाचे नाव असून त्याला उपचाराकरिता जवळच्या रुग्णालयात दाखल करण्यात आल्याचे सुरक्षा अधिका-यांनी सांगितले.
गेल्या २४ तांसात दहशतवाद्यांनी केलेला हा दुसरा हल्ला आहे. या दहशतवाद्याने मेशावर भागातील बुचारी येथील लष्कर ६६३ युनिटजवळही ग्रेनेडच्या सहाय्याने हल्ला केला. संपूर्ण परिसराला सुरक्षा रक्षकांनी घेराव घातला असून दहशतवादी आणि जवानांमध्ये चकमक सुरु आहे. जम्मू-पठाणकोट महामार्ग बंद ठेवण्यात आला आहे.
शुक्रवारीच फियादीनच्या दहशतवाद्यांनी कथुआ जिल्ह्यातील राजबाग पोलीस ठाण्यावर हल्ला केला होता. यामध्ये तीन सुरक्षा रक्षक, दोन नागरिक ठार झाले तर ११ जण जखमी झाले. यावेळी दोन दहशतवाद्यांना कंठस्नान घालण्यात भारतीय जवानांना यश आले.