नवी दिल्ली -बेहिशेबी मालमत्ता प्रकरणात शिक्षा झालेल्या तामिळनाडूच्या माजी मुख्यमंत्री जयललिता ऊर्फ ‘अम्मा’ यांना दुसरा जोरदार दणका बसला आहे. जयललिता यांची आमदारकी रद्द करण्यात आली असून शिक्षेनंतरची ६ वर्षे निवडणूक लढविण्यास बंदी घालण्यात आली आहे. तामिळनाडू सरकारच्या सुधारीत राजपत्रात तसं स्पष्टपणं नमूद करण्यात आलं आहे.
तामिळनाडू विधानसभेचे अध्यक्ष पी. धनपाल यांनी या संदर्भातील अधिसूचना जारी केली आहे. जयललिता या दोषी असल्याने, त्यांच्या शिक्षेच्या दिवसापासून म्हणजेच, २७ सप्टेंबर २०१४ पासून त्यांचं सदस्यत्व रद्द करण्यात येत आहे. तसेच, लोकप्रतिनिधी कायद्याच्या कलम ८नुसार शिक्षा पूर्ण केल्याच्या दिवसापासून पुढील ६ वर्षे जयललिता निवडणूक लढवण्यास अपात्र असतील, असंही अधिसूचनेत म्हटलं आहे. अधिसूचनेद्वारे जयललिता यांचा श्रीरंगम विधानसभा मतदारसंघ रिक्त घोषित करण्यात आला आहे.
बेहिशेबी मालमत्ता प्रकरणात बेंगळुरू येथील विशेष न्यायालयाने जयललिता यांना ६ वर्षे तुरुंगवास व १०० कोटींच्या दंडाची शिक्षा ठोठावली आहे. सर्वोच्च न्यायालयाने १७ ऑक्टोबर रोजी त्यांची जामिनावर मुक्तता केली आहे. मात्र, सक्रीय राजकारणाला ‘अर्धविराम’ लागल्याने अम्मांच्या सुटकेच्या आनंदावर विरजण पडले आहे.