बंगळूरु – सर्वोच्च न्यायालयाने तामिळनाडूच्या माजी मुख्यमंत्री जयललिता यांचा जामीन मंजूर केल्यानंतर बंगळूरुच्या विशेष न्यायालयाने त्यांच्या सुटकेचे आदेश दिले होते. शनिवारी दुपारी जयललिता कारागृहाबाहेर येताच अण्णाद्रमुकच्या समर्थकांनी एकच जल्लोष केला. मागच्या वीस दिवसापासून त्या तुरुंगात बंद होत्या.
न्यायालयाच्या आदेशानुसार जयललिता यांनी दोन कोटी रुपयांचा जातमुचलका भरण्यास तयारी दर्शवल्याने विशेष न्यायालयाचे न्यायमूर्ती जॉन मिशेल कुन्हा यांनी हे सुटकेचे आदेश दिले. तसेच सर्वोच्च न्यायालयाने दिलेल्या आदेशाची एक प्रतही जयललिता यांच्या वकिलांनी विशेष न्यायालयासमोर सादर केली होती.
जयललिता यांचे निकटवर्तीय शशिकला आणि नातेवाईक सुधाकरन आणि इरावरसी यांनीही जामिनाची संपूर्ण प्रक्रिया पूर्ण केल्याने त्यांच्याही सुटकेचे आदेश देण्यात आले आहेत. दुपारनंतर जयललिता तसेच इतर तिघांचीही तुरुंगातून सुटका करण्यात येईल.
२७ सप्टेंबर रोजी ६६.६५ कोटी रुपयांच्या बेहिशोबी मालमत्तेप्रकऱणी जयललिता यांना विशेष न्यायालयाने चार वर्षांचा तुरुंगवास तसेच १०० कोटींची शिक्षा ठोठावली होती. त्यानंतर त्यांनी जामीनासाठी कर्नाटक उच्च न्यायलयात याचिका दाखल केली होती. तेथेही याचिका फेटाळून लावल्यानंतर त्यांनी सर्वोच्च न्यायालयात धाव घेतली. अखेर शुक्रवारी सर्वोच्च न्यायालयाने त्यांच्या शिक्षेला स्थगिती देत त्यांना दोन महिन्यांचा जामीन मंजूर केला