मुंबई – मुंबईही देशाची आर्थिक राजधानी आहे. या शहरात जागतिक वित्त केंद्र उभारण्याची गरज असताना ते पंतप्रधान मोदींनी गुजरातला पळवल्याचे या अर्थसंकल्पातून उघड झाले आहे.
गुजरात आंतरराष्ट्रीय वित्त टेकसिटी (जीआयएफटी) हे केंद्र गुजरातमध्ये ‘आंतरराष्ट्रीय वित्त केंद्र’ या नावाने विकसित करण्यात येणार असल्याची घोषणा अर्थमंत्री अरुण जेटली यांनी केली.
महिन्यापूर्वी झालेल्या परिसंवादात मुंबईत जागतिक वित्त केंद्र उभारण्याची घोषणा केंद्रीय अर्थराज्यमंत्री जयंत सिन्हा यांनी केली होती. मुख्यमंत्री देवेंद्र फडणवीस यांनीही त्याला दुजोरा दिला होता. मात्र, अर्थसंकल्पातून हे केंद्र गुजरातमध्ये उभारण्याचे निश्चित झाले आहे.
या जागतिक वित्त केंद्रासाठी लागणा-या सर्व नियमन मंजु-या मार्चमध्ये देण्यात येणार आहेत. या केंद्राच्या पहिल्या टप्प्याला लवकरच प्रारंभ होणार आहे.
दुबई आणि सिंगापूरला आंतरराष्ट्रीय वित्त केंद्र म्हणून जगभरात मान्यता आहे. या शहरातील सुविधा आता नवीन जागतिक वित्त केंद्रात उभारण्यात येणार आहेत. या केंद्राला कर, नियामकांबाबतच्या सर्व सुविधा पुरवण्यात येईल.