पुणे- ज्येष्ठ संगीतकार आनंद मोडक यांचे शुक्रवारी दुपारी हृदयविकाराच्या झटक्याने पुण्यात निधन झाले. ते ६३ वर्षाचे होते. गुरुवारी संध्याकाळी आनंद मोडक यांना रुग्णालयात दाखल करण्यात आले होते. मात्र शुक्रवारी दुपारी उपचारा दरम्यान त्यांची प्राणज्योत मालवली. कोथरुड येथे त्यांच्या निवासस्थानी त्यांचे पार्थिव अंत्यदर्शनासाठी ठेवण्यात येणार आहे.
घांशीराम कोतवाल या नाटकाच्या संगीताद्वारे त्यांनी कारकिर्दीचा शुभारंभ केला होता. महानिर्वाण, तीन पैशांचा तमाशा, पडघम या नाटकांनाही त्यांनी संगीत दिले. नाटक, नभोवाणी, दूरचित्रवाणी आणि नंतर पुढे चित्रपट असा त्यांचा संगीत प्रवास बहरत गेला. एक होता विदूषक, चौकट राजा, हरिशचंद्राची फॅक्टरी, मुक्ता, तू तिथे मी, कळत- नकळत अशा मराठी आणि हिंदी चित्रपटांमध्ये त्यांनी दर्जेदार संगीत दिले. मोडक यांचे साजणवेळा, अमृतगाथा, शेवंतीच बन, प्रीतरंग, अख्यान तुकोबाचे हे संगीत कार्यक्रमही लोकप्रिय झाले. नुकताच प्रदर्शित झालेल्या यशवंतराव चव्हाण या चित्रपटालाही मोडक यांनी संगीत दिले आहे.