मुरादाबाद – ‘लडके है, गलती हो जाती है’, असे तारे तोडत समाजवादी पक्षाचे अध्यक्ष मुलायम सिंह यांनी मुंबईतील शक्ती मिल बलात्कार प्रकरणातील आरोपींची कड घेतली आहे. या प्रकरणात तीन आरोपींना सुनावण्यात आलेली फाशीची शिक्षा चुकीची असल्याचेही मुलायम यांनी म्हटले आहे.
मुरादाबाद येथील सभेत बोलताना मुलायम यांनी हे वादग्रस्त विधान केले. शक्ती मिल परीसरात टेलिफोन ऑपरेटर तसेच पत्रकार तरुणीवर झालेल्या बलात्कारप्रकरणातील तीन मुख्य आरोपींना फाशीची शिक्षा ठोठावण्यात आली आहे. या निकालाचे देशभरातून स्वागत होत असताना मुलायम यांनी मात्र या तिघा नराधमांची कड घेऊन नव्या वादाला तोंड फोडले आहे.
‘मुंबई बलात्कार प्रकरणातील तिघा आरोपींना फाशीची शिक्षा देणे मला योग्य वाटत नाही. शेवटी ती मुलंच आहेत. त्यांच्याकडून अशाप्रकारच्या चुका होऊ शकतात. पण, त्यासाठी त्यांना थेट फाशीची शिक्षा देणे चुकीचे आहे’, असे मुलायम म्हणाले. ‘मुला-मुलींमध्ये मैत्री असते तोपर्यंत कोणाचीच काही तक्रार नसते. पण दोघांमध्ये भांडण झालं की सगळं बिघडतं. संबंधित मुलगी तिच्यावर बलात्कार झाल्याचा जबाब पोलिसांकडे देते आणि मग बिचाऱ्या मुलाला त्यामुळे फासावर लटकावे लागते’, असा अजब तर्कही मुलायम यांनी लावला आहे. बलात्काराच्या घटनांमध्ये आरोपीला सरकसकट फाशीची शिक्षा देण्यास विरोध करताना मुलायम यांनी यावेळी हुंडाबळी, दलित अत्याचार प्रतिबंधक कायदा यासारख्या कायद्यांचा दुरुपयोग थांबवला गेला पाहिजे, असे नमूद केले. कायद्याचा गैरवापर रोखता येईल, अशाप्रकारचे कायदे आम्ही बनवणार असल्याचे त्यांनी पुढे सांगितले. दरम्यान, मुलायम यांच्या वादग्रस्त विधानाचा विरोधकांनी खरपूस समाचार घेतला असून भाजप, काँग्रेस आणि बसपाने मुलायम यांच्यावर जोरदार हल्ला चढवला आहे.