मुंबई- गेल्या दोन दिवसांपासून शहरात सुरू असलेल्या संततधार पावसाने शनिवारी चांगलाच तडाका दिला. कुलाबा, शिवडी, मालाड येथे पडझडीच्या घटना ताज्या असताना शनिवारी मध्यरात्रीच्या सुमारास ताडदेव येथील व्हाईट हाऊस बारच्या मागील इमारतीचा भाग कोसळल्याने दोन जणांचा मृत्यू तर एक जण जखमी झाला.
मुंबई सेंट्रल पश्चिम येथील व्हाईट हाऊस बारच्या मागे एक मोडकळीस आलेली इमारत आहे. या इमारतीच्या आडोशाला तीन जण झोपले होते. रात्री एक वाजताच्या सुमारास अचानक या इमारतीचा १० फुट उंचीचा भाग कोसळला. या घटनेची माहिती कळताच स्थानिकांनी अग्निशमन दलाला माहिती दिली. जुना भाग कोसळल्याने त्याच्या ढिगा-याखाली दबलेल्या जितेंद्रकुमार विश्वेश्वर प्रसाद सिंग (४५) आणि मनोजकुमार बलराम सिंग (३५) यांना अग्निशमन दलाच्या जवानांनी बाहेर काढले. मात्र त्या दोघांचा जागीच मृत्यू झाला.
तर यात मनीष कुमार सिंकदर सिंग हा जखमी झाला. जखमी मनीषला उपचाराकरता महापालिकेच्या नायर रुग्णालयात पाठवण्यात आले. डॉक्टरांनी मनीषवर उपचार करून त्याला घरी सोडले. तर मृत जितेंद्रकुमार आणि मनोजकुमार या दोघांच्या मृतदेहाचे शवविच्छेदन करुन त्या दोघांचे मृतदेह अंत्यविधीकरता नातेवाईकांच्या ताब्यात देण्यात आले. या प्रकरणाचा पुढील तपास ताडदेव पोलिस करत आहेत.