नवी दिल्ली दि. १२ – दिल्ली विधानसभेच्या निवडणुकांची घोषणा मुख्य निवडणूक आयुक्त व्ही.एस.संपत यांनी सोमवारी पत्रकारपरिषदेत केली. विधानसभेच्या ७० जागांसाठी सात फेब्रुवारी रोजी मतदान होणार आहे. तर दहा फेब्रुवारी रोजी निकाल जाहीर होतील. संपत यांच्या घोषणेसह दिल्लीत आदर्श आचारसंहिता लागू झाली आहे.
दिल्लीत एकूण १.३० कोटी मतदार आहेत. ७० विधानसभा निवडणुकीसाठी ११ हजार ७६३ मतदान केंद्र उभारण्यात येतील असे संपत यांनी सांगितले.
याआधी दिल्लीत २०१३मध्ये झालेल्या विधानसभा निवडणुकीत भाजपला सर्वाधिक ३१ जागा मिळाल्या होत्या. तर प्रथमच निवडणूक लढवणा-या आम आदमी पक्षाला २८ जागा मिळाल्या होत्या. त्यांनी काँग्रेसच्या आठ आमदारांच्या पाठिंब्यावर सरकार स्थापन केले. मात्र लोकपाल विधेयक मंजूर न झाल्याने अरविंद केजरीवाल यांच्या नेत्तृत्वाखालील ‘आप’च्या सरकारने ४९ दिवसांमध्येच राजीनामा दिला होता. तेव्हापासून दिल्लीत राष्ट्रपती राजवट लागू होती. त्यानंतर न्यायालयाच्या हस्तक्षेपानंतर दिल्लीत निवडणुका घेण्याची तयारी सुरु झाली. दिल्लीचे नायब राज्यपाल नजीब जंग यांनी चार नोव्हेंबर २०१४ रोजी दिल्ली विधानसभा विसर्जित करून नव्याने निवडणुका घेण्याची शिफारस केंद्र सरकारला केली होती.