मुंबई दि. २९ – एकटक बघत राहणाऱ्या, अश्लील हावभाव करणाऱ्या आणि रोज घाटकोपर ते सीएसटीपर्यंत पाठलाग करणाऱ्या एका रोडरोमियोला दोन बहिणींनी चांगलीच अद्दल घडविली आहे. पोलिसांनी दखल न घेतल्यानं दोन बहिणींनी स्वत:च भामट्याची मानगूट पकडून त्याला पोलिसांच्या ताब्यात दिलं आहे.
घाटकोपर येथे राहणारी एक तरुणी सीएसटी परिसरात नोकरीला आहे. एकेकाळी तिचा शेजारी असलेला राजेश आष्टेकर नावाचा रिक्षाचालक रोज येता-जाता तिचा पाठलाग करायचा. तिच्याकडं एकटक बघत राहायचा, चित्रविचित्र हावभाव करायचा, अश्लील बोलायचा. या साऱ्याला ती तरुणी कंटाळली होती. त्याविरोधात तिनं घाटकोपरमधील पंतनगर पोलीस ठाण्यात तक्रारही केली. मात्र, काहीच कारवाई न झाल्यामुळं राजेशचे उद्योग सुरूच होते. त्यामुळं या तरुणीनंच त्याला अद्दल घडवायचं ठरवलं.
नेहमीप्रमाणं बुधवारी सकाळी ती कामानिमित्त घराबाहेर पडली. निघताना तिनं तिच्या बहिणीलाही सोबत घेतलं. दोघींनी घाटकोपर स्टेशनला नेहमीची लोकल पकडली. आष्टेकरनेही तीच लोकल पकडली आणि त्यांच्यामागोमाग तो सीएसटीला पोहोचला. प्लॅटफॉर्मवर उतरताच त्यानं नेहमीचे चाळे सुरू केले. त्यावेळी या तरुणींनी त्याला तिथेच पकडले आणि रेल्वे पोलिसांच्या ताब्यात दिले. त्याच्यावर विनयभंगाचा गुन्हा दाखल करण्यात आला असून पुढील चौकशीसाठी कुर्ला जीआरपीच्या ताब्यात देण्यात आलं आहे.