डार्मस्टॅण्डट – चंद्र, मंगळापर्यंत यशस्वी झेप घेणा-या मानवाने आता थेट फिरत्या धूमकेतूवर यशस्वी पाऊल उमटवले आहे. युरोपियन अवकाश संशोधन संस्थेने ‘फिली’ हा यंत्रमानव यशस्वीरित्या ६७ पी/ च्युरुयूमोव्ह-गेरासिमेन्का या धूमकेतूवर उतवरला आहे.
अवकाश संशोधन क्षेत्रातील ही अत्यंत महत्वाची घटना असून, या मोहिमेव्दारे युरोपियन अवकाश संशोधन संस्थेने एक नवी उंची गाठली आहे. रोसेटा या अवकाशयानातून ‘फिली’ला धूमकेतूवर उतरवण्यात आले. युरोपीयन प्रमाणवेळेनुसार पहाटे तीनच्या सुमारास फिली धूमकेतूवर उतरला.
जगभरातील अवकाश संशोधन संस्थांचे या मोहिमेकडे लक्ष लागले होते. कारण फिरत्या धूमकेतूवर यंत्रमानव उतरवणे एक आव्हान होते. विशिष्ट वेळेत फिली धूमकेतूवर पोहचू न शकल्याने युरोपियन अवकाश संशोधन संस्थेतील शास्त्रज्ञांच्या चेह-यावर चिंतेचे भाव उमटले होते. पण शास्त्रज्ञांनी यशस्वीरित्या फिलीला ६७ पी/ च्युरुयूमोव्ह-गेरासिमेन्काच्या बर्फाळ पृष्ठभागावर उतरवले.
Churyumov-Gerasimenko cometफिलीचा प्रवास दशकभरापूर्वी म्हणजे मार्च २००४ मध्ये सुरु झाला होता. २००४ मध्ये रोसेटा अवकाशयान ६७ पी/ च्युरुयूमोव्ह-गेरासिमेन्का धूमकेतूच्या दिशेने झेपावले होते. तब्बल पाच अब्ज किमीचा प्रवास करुन, दहावर्षांनी रोसेटा धूमकेतूनजवळ पोहोचले.
धूमकेतूपासून २२.५ कि.मी.अंतरावर असताना फिली रोसेटापासून वेगळे झाले आणि ६७ पी/ च्युरुयूमोव्ह-गेरासिमेन्काच्या दिशेने प्रवास सुरु केला. आतापर्यंत धूमकेतूच्या छायाचित्रामुळे केवळ त्याच्या बाहयअंगाचा अभ्यास करता येत होता.पण आता यंत्रमानवामुळे धूमकेतूचा सखोल अभ्यास करता येणार आहे. अवकाशातील अनेक घटकांचे उगमस्थान शोधण्यास मदत मिळणार आहे. फिलीवर विशिष्ट प्रकारची उपकरणे बसवण्यात आली असून, त्यातून धूमकेच्या आतील भागातील छायाचित्रे आणि तेथील अन्य घटकांचा अभ्यास करता येणार आहे. या मोहिमेतून सूर्यमालेच्या जन्मासंबंधी महत्वाची माहिती मिळू शकते.