यवतमाळ – नेर शहरातील मुख्य रस्त्यावरील दोन दुकाने फोडल्याची घटना ताजी असतानाच चोरट्यांनी येथील महिला बँकेत दारोड्याचा प्रयत्न केल्याने खळबळ उडाली आहे. बँक असलेल्या इमारतीतील दोन भिंती फोडून चोरट्यांनी बँकेत प्रवेश केला. मात्र लोखंडी दरवाजा असलेली तिजोरी फोडण्यात अपयश आल्याने चोरट्यांचा हा प्रयत्न फसला.
सोमवारी मध्यरात्री बसस्थानकासमोर असलेल्या महिला सहकारी बॅकेस चोरट्यांनी निशाणा बनविले. प्रथम दोन भिंती फोडून चोरटे बँकेत शिरले. मात्र तिजोरीच्या खोलीस लोखंडी दरवाजा असल्याने चोरट्यांनी पुन्हा मागील बाजूने येवून तिजोरीची भिंत फोडण्याचा प्रयत्न केला. मात्र त्यात यश न आल्याने त्यांनी तेथून काढता पाय घेतल्याचे सांगण्यात येते. या बँकेत घटनेच्या वेळी ४० लाख रुपये तिजोरीत होते. ही बाब चोरट्यांना माहिती कशी झाली, हा संशोधनाचा विषय झाला आहे. बँकेत दरोडा टाकण्याचा प्रयत्न झाल्याची माहिती बँकेच्या अध्यक्षांना दिल्यानंतर त्या व व्यवस्थापक दोन तासांनी पोहचल्या. त्यामुळे पोलीस पथकही उशिरा पोहचले. बँकेत दरोडा टाकण्यापूर्वी दरोडेखोरांनी मागच्या बाजूस असलेल्या चौकीदारावर चाकू रोखल्याची माहिती आहे. घटनास्थळी उपविभागीय पोलीस अधिकारी कल्पना भराडे, एलसीबीचे सहाय्यक पोलीस निरीक्षक निलेश ब्राम्हणे, ठाणेदार गणेश भावसार यांनी भेट देऊन पाहणी केली. काही दिवसांपूर्वी शहरात तीन दुकाने फोडून चोरट्यांनी एक लाखाचा ऐवज लंपास केला होता. त्यानंतर हा गंभीर प्रकार उघडकीस आला. या प्रकरणी पोलिसांनी ४५७, ५११, ३८० गुन्हे दाखल केले.