यवतमाळ , दि. ३१ – शिक्षण संस्थेत शिपाई व शिक्षण पदावर नोकरी लावून देण्याचे आमिष दाखवून ११ लाख रुपयाने फसवणूक केली. याप्रकरणी कोटंबा येथील शिक्षण संस्था अध्यक्ष विजय डांगे विरुद्ध फसवणुकीचा गुन्हा नोंद करण्यात आला आहे.
कोटंबा येथे तथागत विद्यालय असून, या शाळेत शिपाई व शिक्षक पदावर नोकरी देण्याचे आमिष बालाजी खताळ यास दाखविले. नोकरीसाठी म्हणून ११ लाख रुपये घेतले. पैसे घेतल्यानंतर ११ महिन्यांची आॅर्डर दिली. मात्र कालावधी संपल्यानंतर वाढीव मुदत न देता नोकरीवरून काढून टाकले. यापूर्वी देखील विजय डांगे याने नोकरीच्या नावाखाली अनेकांची फसवणूक केल्याचे सांगितल्या जाते. नोकरी न मिळता ११ लाखाने फसवणूक झाल्याचे लक्षात येताच फकीरराव नानासाहेब दहिभाते रा. सायखेडा याने बाभूळगाव पोलीस ठाणे गाठून तक्रार दिली. त्यावरून पोलिसांनी विजय डांगे याच्याविरुद्ध फसवणुकीचा गुन्हा नोंद केला आहे. फसवणुकीची पुन्हा एक घटना बाभूळगाव तालुक्यात उघडकीस आल्यामुळे खळबळ उडाली आहे.