वेलिंग्टन –न्यूझीलंड विरुध्द इंग्लंड लढतीत न्यूझीलंडने सामन्यावर एकहाती वर्चस्व गाजवत विश्वचषक स्पर्धेतील सलग तिस-या विजयाची नोंद केली.
न्यूझीलंडने इंग्लंडवर आठ गडी आणि तब्बल ३८ षटके राखून दणदणीत विजय मिळवला. शुक्रवारी वेलिंग्टन येथे झालेल्या सामन्यात न्यूझीलंडने इंग्लंडला अक्षरक्ष लोळवले.
आधी टीम साउदीची आग ओकणारी गोलंदाजी त्यानंतर ब्रेंडन मॅककलमच्या वादळाने इंग्लिश आर्मीची दाणादाण उडवून दिली. साउदीने नऊ षटकात ३३ धावा मोजत इंग्लंडच्या तब्बल सात फलंदाजांना माघारी धाडले. त्यानंतर १२४ धावांच्या माफक लक्ष्याचा पाठलाग करण्यासाठी सलामीला आलेला न्यूझीलंडचा कर्णधार मॅककलम पहिल्या चेंडूपासून इंग्लिश गोलंदाजांवर तुटून पडला.
अवघ्या १८ चेंडूत त्याने अर्धशतक झळकवले. ऑस्ट्रेलिया विरुध्दच्या सामन्यात हॅटट्रीक घेणा-या स्टीव्हन फिनच्या गोलंदाजीच्या तर मॅककलमने अक्षरक्ष चिंधडया उडवल्या. फिनच्या दोन षटकात न्यूझीलंडने ४९ धावा कुटल्या. मॅककलमने २५ चेंडूत ७७ धावा केल्या. यात आठ चौकार आणि सात षटकारांचा समावेश होता. १०५ धावांची सलामी दिल्यानंतर ख्रिस वोक्सने मॅककलमच्या यष्टया वाकवल्या.
मार्टिन गुप्टील २२ धावा करुन बाद झाला. त्यालाही वोक्सने बाद केले. विल्यमसन आणि टेलरने न्यूझीलंडच्या विजयावर शिक्कामोर्तब केले. न्यूझीलंडने या सामन्यातील खेळाने आपण विजेतेपदाचे प्रबळ दावेदार का आहोत ते दाखवून दिले. हा विजय न्यूझीलंडचे मनोबल उंचावणारा तर, इंग्लंडचे मनोधैर्य खच्ची करणारा आहे.
तत्पूर्वी नाणेफेक जिंकून प्रथम फलंदाजी करण्याचा इंग्लिश कर्णधार इयॉन मॉर्गनचा निर्णय इंग्लंडच्या चांगलाच अंगलट आला. टिम साउदीच्या आग ओकणा-या गोलंदाजीसमोर इंग्लिश फलंदाज धारातीर्थी पडले.
साउदीच्या भेदक गोलंदाजीमुळे इंग्लंडचा डाव अवघ्या १२३ धावात संपुष्टात आला. साउदीने नऊ षटकात ३३ धावांच्या मोबदल्यात इंग्लंडच्या सात फलंदाजांना तंबूची वाट दाखवली. रुटचा अपवाद वगळता इंग्लंडचा एकही फलंदाज न्यूझीलंडच्या गोलंदाजांचा समर्थपणे सामना करु शकला नाही.
रुटने सर्वाधिक (४६) धावा केल्या. तब्बल सतरा षटके बाकी असताना इंग्लंडचा डाव आटोपला. इंग्लंडचे शेवटचे सहा फलंदाज फक्त १९ धावात तंबुत परतले. संघाची धावसंख्या १०४ असताना मॉर्गनच्या (१७) रुपात इंग्लंडचा चौथा गडी बाद झाला त्यानंतर इंग्लंडच्या डावाला जी गळती लागली ती शेवटपर्यंत थांबलीच नाही. रुट बाद होणारा इंग्लंडचा शेवटचा फलंदाज ठरला. त्याला मिल्नेने व्हिटोरीकरवी झेलबाद केले.
इंग्लंडकून फक्त रुट आणि मॉर्गनमध्ये चौथ्या विकेटसाठी ४७ धावांची मोठी भागीदारी झाली. त्या व्यतिरिक्त इंग्लंडकडून डाव सावरणारी एकही भागीदारी होऊ शकली नाही. सात दिवसात तिसरा सामना खेळणारा न्यूझीलंड आतापर्यंत श्रीलंका आणि स्कॉटलंड विरुध्दचे दोन सामने जिंकून गटात अव्वल स्थानावर आहे.