पाटणा – येथे २७ ऑक्टोबर २०१३ रोजी पंतप्रधान नरेंद्र मोदी यांच्या ‘हुंकार रॅली’ दरम्यान झालेल्या बॉम्बस्फोटप्रकरणी इंडियन मुजाहिदीन (आयएम) आणि स्टुटंड इस्लामिक मूव्हमेंट ऑफ इंडिया (सिमी)च्या अकरा संशयितांविरोधात राष्ट्रीय तपास यंत्रणेच्या (एनआयए) विशेष कोर्टाने गुन्हा दाखल केला आहे. या घटनेत सहा जणांचा मृत्यू झाला होता, तर १०० जण जखमी झाले होते.
एनआयएचे विशेष न्यायाधीश अनिल कुमार सिंग यांच्यासमोर १९ जानेवारीपासून या प्रकरणातील साक्षीदारांची सुनावणी होणार आहे. या प्रकरणी हैदर अली, नूमन अन्सारी, तौफिक अन्सारी, उमर सिद्दिकी, अजरुद्दीन कुरेशी, इफ्तिकार आलम, फिरोज आलम, अहमद हुसेन, फकरुद्दीन आणि अन्य एका अल्पवयीन संशयितांवर विविध कायद्यांखाली गुन्हे दाखल करण्यात आले आहेत. संशयितांपैकी हैदर अली हा ‘सिमी’चा दहशतवादी असून, तो जुलै २०१३ बोधगया येथील साखळी बॉम्बस्फोट प्रकरणीही पोलिसांना हवा आहे.
दरम्यान, रॅली दरम्यान, १७ बॉम्ब पेरण्यात आले होते. त्यापैकी सात बॉम्बचा स्फोट झाल्याची माहिती समोर येत आहे. या प्रकरणी तौफिकला पाटणा पोलिसांनी अटक केली होती. तो स्फोटा दरम्यान जखमी झाला होता. अन्य आरोपींना देशाच्या विविध भागांतून ताब्यात घेण्यात आले होते.