कोल्हापूर – कामगार, कष्टकरी, उपेक्षितांचे नेते आणि महाराष्ट्राच्या पुरोगामी चळवळीचे ऊर्जाकेंद्र असलेल्या कॉम्रेड गोविंदराव पानसरे यांच्या मारेक-यांचा शोध लावण्यात अद्याप पोलिसांना यश आलेले नाही. पोलिसांनी पानसरेंवर हल्ला करणा-यांची माहिती देणा-यास पाच लाखांचे बक्षिस देण्याची घोषणा केली आहे. कोल्हापूर जिल्ह्याचे पोलिस अधिक्षक मनोजकुमार यांनी ही माहिती दिली. यासंदर्भात माहिती देणा-याचे नाव गुप्त ठेवण्यात येईल असेही ते म्हणाले. माहिती देण्यासाठी ०९७६४००२२७४ या क्रमांकावर संपर्क करण्याचे आवाहन पोलिसांनी केले आहे.
पोलिसांनी पानसरे यांच्या पत्नी उमा यांची सुरक्षा वाढवली आली आहे. उमा यांच्यावर अॅस्टर आधार हॉस्पिटलमध्ये उपचार सुरू आहेत. त्या प्रत्यक्ष घटनेच्या साक्षीदार असल्याने पोलिस प्रशासनाने बंदोबस्त वाढवला आहे.
पानसरे आणि त्यांच्या पत्नी उमा यांच्यावर १६ फेब्रुवारी अज्ञात हल्लेखोरांनी गोळीबार केला होता. पाच दिवस पानसरेंची मृत्यूशी झुंज सुरू होती. शुक्रवारी रात्री पावणेअकरा वाजता मुंबईत पानसरेंची प्राणज्योत मालवली. त्यांच्या मारेक-यांना लवकरात लवकर अटक करण्याची मागणी सर्व डाव्या पक्षांसह समाजातील सर्व स्तरातून होत आहे.