यवतमाळ, दि. 20 : ग्रामविकास विभागाचे प्रधान सचिव तथा जिल्ह्याचे पालक सचिव व्ही.गिरीराज यांनी आज जिल्ह्यात जलयुक्त शिवार अभियानांतर्गत सुरू असलेल्या कामांना भेटी देऊन पाहणी केली. या भेटीत त्यांनी गावकऱ्यांशी संवाद साधला. यावेळी मुख्य कार्यकारी अधिकारी डॅा.मल्लिनाथ कलशेट्टी, गटविकास अधिकारी प्रकाश नाटकर, तालुका कृषी अधिकारी श्री.भवरे, मनपुर गावचे सरपंच श्री.पारधी यांच्यासह गावकरी मोठ्या संख्येने उपस्थित होते. जलयुक्त शिवार योजनेंतर्गत मनपुर येथे शेततळ्याचे काम सुरू आहे. या शेततळ्याची श्री.गिरीराज यांनी पाहणी केली. तसेच कामाबाबत गावकऱ्यांशी चर्चा केली. मनपुर येथीलच पाणी शुध्दीकरण प्रकल्पासही त्यांनी भेट दिली. राष्ट्रीय ग्रामीण रोजगार हमी योजनेंतर्गत करण्यात आलेल्या रस्ता दुतर्फा वृक्ष लागवडीची पाहणीही त्यांनी केली. यावेळी उपस्थित सरपंच, ग्रामसेवक यांना वृक्षांची निगा राखण्याचे निर्देश त्यांनी दिले. जास्तित जास्त झाडे जगली पाहिजे, असे ते म्हणाले. जलयुक्त शिवार अभियानाची माहितीही त्यांनी यावेळी गावकऱ्यांकडून घेतली.